𞤙𞤢𞤤𞤲𞤣𞤫 𞤆𞤫𞥅𞤪𞤢 – 𞤘𞤮𞤪𞤳𞤮 𞤒𞤭𞤢𞥄𞤳𞤢

𞤖𞤉𞥅 𞤳𞤢𞥄𞤱𞤫𞥅

𞤖𞤫𞥅 𞤳𞤮 𞤽𞤢𞤤𞤲𞤭𞤯𞤭

𞤑𞤮 𞤻𞤢𞤤𞤲𞤣𞤫 𞤻𞤢𞤤𞤢 𞤨𞤫𞥅𞤪𞤢 𞤥𞤢𞤳𞥆𞤮 𞤬𞤭𞤪𞤼𞤢𞥄!

𞤅𞤵𞤣𞥆𞤭𞥅𞤯𞤮 𞤱𞤭𞤫𞤼𞤫𞥅𞤯𞤮 𞤈𞤄 𞤸𞤫𞤩𞤭𞥅 𞤸𞤫𞤪𞤧𞤢 𞤲𞤺𞤵𞥅𞤪𞤣𞤢𞤥. 𞤑𞤮 𞤥𞤢𞤱𞤯𞤮 𞤥𞤮 𞤸𞤮 𞤢𞤲𞤣𞤢𞥄𞤲𞤮 𞤬𞤢𞤱𞤭 𞤥𞤮 𞤳𞤢𞥄 𞤸𞤫𞤪𞤧𞤢. 𞤑𞤮 𞤱𞤫𞤤𞤣𞤭𞥅𞤯𞤮 𞤸𞤢𞤳𞥆𞤮 𞤱𞤭𞤫𞤼𞤫𞥅𞤯𞤮 𞤅𞤢𞤴𞤳𞤵 𞤸𞤮𞤤𞥆𞤭𞥅𞤲𞤣𞤭𞤪𞤭 𞤥𞤮 𞤫 𞤮𞥅 𞤥𞤢𞤱𞤯𞤮 𞤶𞤢𞤲𞤬𞤭𞥅𞤯𞤮 𞤥𞤮.

𞤑𞤮 𞤅𞤢𞤴𞤳𞤵 𞤲𞤮𞤣𞥆𞤭 𞤥𞤮 𞤻𞤢𞤤𞤲𞤣𞤫 𞤺𞤮𞥅𞤪𞤫⹁ 𞤱𞤭𞤭 𞤥𞤮: “𞤃𞤭 𞤸𞤫𞤩𞤢𞤲𞤭𞥅 𞤥𞤢 𞤥𞤮𞥅𞤣𞤭”. 𞤇𞤫 𞤸𞤢𞤤𞤣𞤭 𞤴𞤢𞤸𞤵𞤺𞤮𞤤 𞤴𞤭𞤢 𞤮𞥅 𞤥𞤢𞤱𞤯𞤮. 𞤌𞤲 𞤥𞤢𞤱𞤯𞤮 𞤲𞤮𞤲⹁ 𞤱𞤮𞤲𞤢𞥄 𞤸𞤢𞤴 𞤳𞤢 𞤧𞤢𞥄𞤪𞤫 𞤂𞤢𞤦𞤫 𞤯𞤮𞤲 𞤮 𞤸𞤮𞤯𞤭. 𞤑𞤮 𞤢𞤪𞤵𞤯𞤮 𞤼𞤭𞤨𞥆𞤭𞥅 𞤫 𞤱𞤫𞥅𞤪𞤭𞤪𞤣𞤫. 𞤏𞤮𞤲𞤢𞥄 𞤸𞤢𞤴 𞤫 𞤸𞤮𞤯𞤮 𞤥𞤢𞥄 𞤫 𞤺𞤢𞤤𞥆𞤫. 𞤑𞤮 𞤳𞤢 𞤱𞤫𞥅𞤪𞤭𞤪𞤣𞤫 𞤯𞤮𞤲 𞤈𞤄 𞤫 𞤅𞤢𞤴𞤳𞤵 𞤴𞤢𞤸𞤭 𞤩𞤫 𞤴𞤭𞥅𞤣𞤭 𞤫 𞤥𞤢𞤳𞥆𞤮. 𞤇𞤢𞤴𞤼𞤭 𞤥𞤢𞤱𞤯𞤮 𞤮𞤲 𞤴𞤭𞤭𞥅 𞤈𞤄⹁ 𞤮 𞤱𞤭𞤭⹁ 𞤮𞤥𞤮 𞤬𞤢𞥄𞤤𞤢𞥄 𞤥𞤮 𞤼𞤭𞤺𞥆𞤵𞤣𞤫. 𞤑𞤮𞤲𞤮 𞤳𞤢𞤲𞤳𞤮 𞤱𞤮𞤲𞤢𞥄 𞤘𞤭𞤲𞤫 𞤮 𞤶𞤮𞥅𞤯𞤭𞥅⹁ 𞤳𞤮 𞤫 𞤤𞤫𞤴𞤣𞤭 𞤱𞤭𞤫𞤼𞤫𞥅𞤲𞤣𞤭 𞤀𞤤𞤶𞤫𞤪𞤭𞥅 𞤮 𞤸𞤮𞤯𞤭.

𞤈𞤄 𞤲𞤵𞤲𞥆𞤭 𞤶𞤢𞤩𞤭 𞤳𞤮 𞤮𞥅 𞤥𞤢𞤱𞤯𞤮 𞤭𞤲𞥆𞤫𞤼𞤫𞥅𞤯𞤮 𞤃𞤮𞤸𞤢𞤥𞥆𞤫𞤣 𞤸𞤢𞥄𞤤𞤭. 𞤳𞤮𞤲𞤮 𞤸𞤮 𞤱𞤭𞤭⹁ 𞤸𞤮𞤥𞤮 𞤸𞤢𞥄𞤲𞤭 𞤢𞤲𞤣𞤭𞤲𞤣𞤫 𞤴𞤭𞤥𞤩𞤫 𞤸𞤢𞤳𞥆𞤮 𞤩𞤫𞤲 𞤼𞤢𞤸𞤮.

𞤉 𞤬𞤭𞤤𞥆𞤢𞤴𞤫𞥅 𞤈𞤄: ” 𞤃𞤢𞤱𞤯𞤮 𞤮𞤲 𞤪𞤮𞤳𞥆𞤭 𞤥𞤫𞤲 𞤵𞤶𞤵𞤲𞤫 𞥒𞥐𞥐 𞤳𞤮 𞤥𞤫𞤲 𞤦𞤢𞤳𞤮𞤪𞤢. 𞤇𞤢𞥄𞤱𞤮 𞤯𞤵𞤲⹁ 𞤮 𞤢𞤪𞤭 𞤥𞤫𞤲 𞤴𞤭𞥅𞤣𞤭⹁ 𞤥𞤭 𞤲𞤢𞤩𞤭 𞤥𞤮 𞤳𞤢 𞤺𞤢𞤤𞥆𞤫 𞤢𞤥𞤫𞤲⹁ 𞤥𞤭 𞤸𞤮𞤤𞥆𞤭𞤲’𞤣𞤭𞤪𞤭 𞤥𞤮 𞤫 𞤶𞤢𞥄𞤶𞤭𞤪𞤢𞥄𞤸𞤮 𞤢𞤲 𞤮𞤲. 𞤑𞤢𞤥𞤩𞤫 𞤯𞤭𞤯𞤮⹁ 𞤩𞤫 𞤴𞤫𞤱𞤼𞤭 𞤳𞤮 𞤶𞤵𞥅𞤼𞤭. 𞤐𞤣𞤫𞤲⹁ 𞤥𞤢𞤱𞤯𞤮 𞤮𞤲 𞤱𞤭𞤭 𞤴𞤮 𞤥𞤭 𞤬𞤢𞤱𞤼𞤢𞤲𞤮 𞤥𞤫𞤲 𞤴𞤮𞤩𞤵𞤺𞤮𞤤 𞤬𞤭𞥅 𞤨𞤫𞥅𞤪𞤢 𞤳𞤢𞤲 𞤸𞤢𞥄 𞤮 𞤪𞤵𞤼𞥆𞤮𞥅 𞤀𞤤𞤶𞤫𞤪𞤭𞥅. 𞤅𞤮 𞤮 𞤸𞤫𞤱𞤼𞤭𞤼𞤮𞤴𞤭𞥅⹁ 𞤮 𞤴𞤮𞤩𞤭𞤼𞤢𞤴 𞤤𞤢𞤲 𞤳𞤢𞤤𞤢 𞤳𞤮 𞤥𞤭 𞤴𞤮𞤩𞤭 𞤬𞤭𞥅 𞤶𞤮𞤥𞤦𞤵𞤲’𞤺𞤢𞤤 𞤲𞤺𞤢𞤤. 𞤃𞤫𞤲 𞤸𞤢𞥄𞤤𞤣𞤭 𞤥𞤫𞤲 𞤬𞤮𞤼𞥆𞤭⹁ 𞤼𞤫𞥅𞤺𞤢𞤤 𞤲𞤺𞤢𞤤 𞤳𞤮 𞤻𞤢𞤤𞤲𞤣𞤫 𞥑𞥖 𞤅𞤭𞤤𞤼𞤮 𞤱𞤢𞤯𞤢𞤼𞤢.

𞤙𞤢𞤤𞤲𞤣𞤫 𞤺𞤮𞥅𞤪𞤫 𞤩𞤢𞤱𞤼𞤭 𞤯𞤵𞤲 ⹁ 𞤃𞤮𞤸𞤢𞤥𞥆𞤫𞤣 𞤼𞤢𞤱𞤭 𞤤𞤢𞤲 𞤳𞤢 𞤥𞤭 𞤺𞤮𞤤𞥆𞤢𞤼𞤢 𞤯𞤮𞤲⹁ 𞤮 𞤪𞤮𞤳𞥆𞤭 𞤤𞤢𞤲 𞤵𞤶𞤵𞤲𞤫 𞥑𞥐𞥐 𞤴𞤫𞥅𞤧𞤮 𞤩𞤫 𞤥𞤭 𞤺𞤮𞤤𞥆𞤭𞤣𞤢𞤼𞤢 𞤩𞤫𞤲 . 𞤃𞤭 𞤰𞤫𞤼𞥆𞤭 𞤯𞤭𞤲 𞤲𞤦𞤵𞥅𞤯𞤭 𞤥𞤭 𞤴𞤢𞤸𞤭 𞤳𞤢 𞤸𞤮𞤯𞤮 𞤢𞤥𞤫𞤲 𞤥𞤭 𞤴𞤭𞥅𞤣𞤭 𞤫 𞤥𞤭𞤻𞥆𞤭𞤪𞤢𞥄𞤸𞤮 𞤲𞤫𞥅𞤲𞤫 𞤢𞤲 𞤮𞤲.

𞤉 𞤪𞤫𞤬𞤦𞤭𞤪𞥆𞤫 𞤥𞤢𞤤𞥆𞤢 𞤢𞤤𞤢𞤼⹁ 𞤴𞤭𞤥𞤩𞤫 𞤢𞤪𞤭. 𞤇𞤫 𞤬𞤵𞤯𞥆𞤭 𞤣𞤫𞤬𞤵𞤣𞤫 𞤻𞤢𞥄𞤥𞤤𞤭 𞤯𞤭𞤲. 𞤘𞤮𞤯𞥆𞤭 𞤯𞤭𞤲 𞤳𞤮 𞤸𞤢𞤲𞤳𞤭 𞤫 𞤢𞥄𞤩𞤵𞤲’𞤣𞤫 𞤺𞤢𞤧𞤢𞤴𞤲𞤮𞥅 𞤣𞤫𞤬𞤫𞥅𞤣𞤫.

𞤑𞤮 𞤸𞤢𞤲𞤳𞤭 𞤳𞤢𞤣𞤭⹁ 𞤫 𞤻𞤢𞤤𞤢𞥄𞤲𞤣𞤫 𞤼𞤮𞤯𞥆𞤢𞥄𞤲𞤣𞤫 𞤲𞤣𞤫𞤲 𞤬𞤭𞥅 𞤨𞤫𞥅𞤪𞤢 𞤳𞤢𞤲⹁ 𞤅𞤢𞤴𞤳𞤵 𞤲𞤮𞤣𞥆𞤭 𞤶𞤢𞥄𞤶𞤭𞤪𞤢𞥄𞤸𞤮 𞤢𞤲 𞤮𞤲⹁ 𞤮 𞤱𞤭𞤭 𞤥𞤮 𞤨𞤫𞥅𞤪𞤢 𞤬𞤭𞤪𞤼𞤢𞥄𞤥𞤢. 𞤌 𞤱𞤭𞤭 𞤥𞤮 𞤳𞤢𞤣𞤭 𞤱𞤮𞤲𞤣𞤫 𞤳𞤮 𞤥𞤭𞤲 𞤱𞤮𞤲𞤭 𞤧𞤢𞤦𞤵 𞤬𞤭𞤪𞤼𞤢𞤺𞤮𞤤 𞤨𞤫𞥅𞤪𞤢 𞤳𞤢𞤲. 𞤐𞤣𞤫𞤲 𞤧𞤢𞤴 𞤲𞤫𞥅𞤲𞤫 𞤢𞤲 𞤲𞤮𞤣𞥆𞤭 𞤤𞤢𞤲 𞤤𞤢𞤲𞤣𞤭𞥅 𞤤𞤢𞤲 𞤧𞤭 𞤳𞤮 𞤥𞤭𞤲 𞤬𞤭𞤪𞤼𞤭. 𞤃𞤭 𞤱𞤭𞤭 𞤩𞤫⹁ 𞤱𞤮𞤲𞤢𞥄 𞤥𞤭𞤲 𞤬𞤭𞤪𞤼𞤭. 𞤖𞤢𞤴 𞤦𞤭𞤥𞤦𞤭 𞤥𞤭 𞤴𞤫𞤱𞤼𞤵𞤣𞤵𞤲𞤮 𞤫 𞤃𞤮𞤸𞤢𞤥𞥆𞤫𞤣 𞤳𞤢𞤻𞤵𞤲 𞤫 𞤺𞤮𞤤𞥆𞤮𞥅𞤱𞤮 𞤮𞤲 𞤳𞤢 𞤱𞤫𞥅𞤪𞤭𞤪𞤣𞤫. 𞤑𞤮 𞤩𞤢𞥄𞤱𞤮 𞤯𞤵𞤲⹁ 𞤥𞤭 𞤲𞤮𞤣𞥆𞤢𞥄 𞤥𞤭𞥅 𞤴𞤫𞥅𞤼𞤢𞥄 𞤱𞤮𞤲𞤣𞤫 𞤨𞤫𞥅𞤪𞤢 𞤳𞤢𞤲 𞤤𞤢𞥄𞤼𞤮𞤼𞤢𞥄𞤳𞤮. 𞤇𞤫 𞤱𞤭𞤭 𞤤𞤢𞤲 𞤳𞤢𞤣𞤭 𞤃𞤮𞤸𞤢𞤥𞥆𞤫𞤣 𞤸𞤢𞤴 𞤴𞤢𞤸𞤭𞥅 𞤸𞤢𞥄 𞤩𞤢𞤣𞤮𞤴𞤭𞤳𞤫 𞤃𞤢𞥄𞤥𞤵𞤲. 𞤚𞤢𞤱𞤭 𞤢𞤤𞤢𞥄 𞤳𞤮 𞤥𞤭 𞤸𞤢𞥄𞤤𞤢. 𞤃𞤢𞤱𞤩𞤫 𞤥𞤵𞤧𞤭𞤣𞤢𞤤 𞤫 𞤼𞤮𞥅𞤤𞤮𞤣𞤢𞤤 𞤬𞤮𞤨 𞤸𞤢𞤪𞤭 𞤥𞤮𞥅𞤩𞤭𞤳𞤫 𞤳𞤢 𞤢𞤥𞤫𞤲. 𞤇𞤢𞤴 𞤳𞤮𞤼𞤮𞥅 𞤢𞤲 𞤴𞤫𞥅𞤼𞤭𞤳𞤫 𞤴𞤭𞤥𞤩𞤫 𞤩𞤫𞤲⹁ 𞤥𞤫𞤲 𞤬𞤮𞤨 𞤥𞤫𞤲 𞤱𞤵𞤤𞥆𞤭.

𞤑𞤮 𞤥𞤫𞤼𞥆𞤭 𞤤𞤢𞤲⹁ 𞤳𞤮 𞤶𞤢𞤲𞤬𞤢 𞤳𞤢𞤲⹁ 𞤧𞤢𞤦𞤵 𞤸𞤢𞤪𞤭 𞤥𞤭𞤯𞤮 𞤬𞤢𞥄𞤤𞤢𞥄 𞤶𞤮𞤥𞤦𞤫𞥅𞤣𞤫⹁ 𞤳𞤢𞤣𞤭 𞤥𞤫𞤲 𞤲𞤢𞥄𞤣𞤭 𞤳𞤮 𞤴𞤢𞤱𞤼𞤭 𞤣𞤵𞤦𞤵𞥅𞤶𞤫 𞤯𞤭𞤯𞤭 𞤬𞤭𞥅 𞤳𞤢 𞤨𞤫𞥅𞤪𞤢. 𞤑𞤮 𞤅𞤢𞤴𞤳𞤵 𞤲𞤮𞤲 𞤱𞤮𞤲𞤭 𞤧𞤢𞤦𞤵 𞤯𞤵𞤲⹁ 𞤩𞤢𞤴𞤼𞤭 𞤥𞤭 𞤢𞤲𞤣𞤢𞥄𞤲𞤮 𞤮𞥅 𞤥𞤢𞤱𞤯𞤮. 𞤑𞤮 𞤅𞤢𞤴𞤳𞤵 𞤸𞤮𞤤𞥆𞤭𞤲’𞤣𞤭𞤪𞤭 𞤤𞤢𞤲 𞤫 𞤥𞤢𞤳𞥆𞤮. 𞤏𞤮𞤲𞤢𞥄 𞤫 𞤲𞤣𞤫𞤪 𞤩𞤫𞤴𞤲𞤺𞤵𞥅𞤪𞤫 𞤥𞤫𞤲 𞤼𞤢𞤱𞤭 𞤥𞤮. 𞤑𞤮 𞤫 𞤱𞤫𞥅𞤪𞤭𞤪𞤣𞤫 (𞤸𞤮𞤼𞤫𞤤). 𞤃𞤭𞤯𞤮 𞤱𞤢𞥄𞤱𞤭 𞤥𞤵𞤻𞥆𞤢𞥄𞤣𞤫 𞤸𞤫𞤪𞤧𞤢 𞤳𞤢𞤲⹁ 𞤳𞤮𞤲𞤮 𞤳𞤢𞥄𞤤𞤭𞤧𞤭𞥅𞤶𞤭 𞤯𞤭𞤲⹁ 𞤴𞤮 𞤩𞤫 𞤴𞤮𞤩𞤭𞤼𞤵.”

𞤑𞤮 𞤪𞤫𞥅𞤲𞤢𞤺𞤮𞤤. 𞤅𞤮 𞤫𞤲 𞤱𞤮𞤨𞥆𞤭𞥅 𞤨𞤭𞤲𞤫 𞤥𞤫𞤲⹁ 𞤫𞤲 𞤣𞤢𞤯𞤢𞤼𞤢𞥄 𞤧𞤭𞤬𞤢 𞤯𞤫𞥅 𞤼𞤮𞥅𞤻𞤫 𞤫 𞤲𞤣𞤫𞥅 𞤦𞤫𞤱𞤪𞤫. 𞤖𞤢𞤪𞤭 𞤢𞤪𞤢𞤲𞤵𞤲⹁ 𞤳𞤮 𞤥𞤢𞤱𞤩𞤫 𞤩𞤫𞤲 𞤸𞤭𞤳𞥆𞤭𞤼𞤫𞤲𞤮𞥅 𞤴𞤫𞥅𞤧𞤮 𞤬𞤭𞥅 𞤰𞤢𞤥𞤢𞤤. 𞤑𞤮 𞤰𞤢𞤥𞤮𞥅𞤱𞤮 𞤮𞤲 𞤭𞤥𞥆𞤭𞤲𞤲𞤢𞤴𞤲𞤮𞥅 𞤥𞤢𞤱𞤩𞤫 𞤥𞤵𞤲 𞤩𞤫𞤲 𞤳𞤢 𞤥𞤢𞤱𞤩𞤫 𞤣𞤫𞤦𞥆𞤮 𞤮𞤲⹁ 𞤧𞤭 𞤣𞤫𞤱𞤢𞤺𞤢𞤤 𞤸𞤵𞤥𞤫𞥅. 𞤔𞤮𞥅𞤲𞤭⹁ 𞤧𞤮 𞤼𞤢𞤱𞤭𞥅 𞤴𞤭𞤥𞤩𞤫 𞤯𞤭𞤯𞤮 𞤼𞤵𞤲 𞤲𞤮 𞤸𞤢𞥄𞤤𞤣𞤢 𞤬𞤮𞤼𞥆𞤢 𞤬𞤭𞤩𞤢 𞤣𞤫𞤱𞤺𞤢𞤤 𞤸𞤢𞤪𞤢 𞤴𞤭𞤥𞤩𞤫 𞤺𞤮𞤪𞤳𞤮 𞤮𞤲 𞤴𞤭𞤢𞥄𞤳𞤢 𞤳𞤢 𞤥𞤢𞤱𞤩𞤫 𞤣𞤫𞤦𞥆𞤮 𞤮𞤲⹁ 𞤱𞤮𞤼𞤢 𞤥𞤮 𞤽𞤢𞤤𞤯𞤵 𞤫 𞤳𞤮 𞤸𞤫𞤩𞤭 𞤳𞤮𞤲 𞤈𞤄. 𞤚𞤫𞤣𞥆𞤭𞤲𞤫𞤲 𞤨𞤭𞤲𞤫 𞤥𞤫𞤲.

𞤑𞤵𞤯𞤮𞤤 𞤐𞤢𞤲𞤣𞤮𞤤𞥆𞤢𞤱𞤮𞤤

𞤀𞤷𞥆𞤫𞥅 𞤯𞤮𞤮 𞤥𞤭𞥅𞤶𞤮 𞤥𞤮𞤲