𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞤥 𞤅𞤢𞤥𞤦𞤫𞥅𞤺𞤵 𞤤𞤮𞤤𞥆𞤭𞤪𞤩𞤫 𞤑𞤢𞤪𞤢𞤥𞤮𞤳𞤮 𞤀𞤤𞤬𞤢𞥄 𞤥𞤮 𞤚𞤭𞤥𞤦𞤮⹁ 𞤣𞤢𞤻𞤢𞥄𞤥𞤢 𞤚𞤭𞤥𞤦𞤮 𞤸𞤫𞤤𞥆𞤢 𞤸𞤭𞤼𞤢𞥄𞤲𞤣𞤫 𞥑𞥖𞥙𞥐. 𞤑𞤮 𞤩𞤫 𞤺𞤫𞤯𞤢𞤤 𞤐𞤫𞥅𞤲𞤫 𞤔𞤭𞤦𞤢 𞤫 𞤥𞤮𞥅𞤣𞤭 𞤐𞤵𞥅𞤸𞤵 𞤧𞤭𞥅 𞤄𞤢𞤪𞤭. 𞤐𞤵𞥅𞤸𞤵 𞤳𞤮 𞤺𞤫𞤯𞤢𞤤𞤶𞤮 𞤑𞤭𞥅𞤳𞤢𞤤𞤢 𞤥𞤮 𞤅𞤫𞤴𞤣𞤭 (𞤄𞤢𞤪𞤭). 𞤑𞤮 𞤅𞤫𞤴𞤣𞤭 𞤫 𞤥𞤢𞤱𞤲𞤭𞤪𞤢𞥄𞤱𞤮 𞤥𞤵𞤵𞤲 𞤭𞤲𞥆𞤫𞤼𞤫𞥅𞤯𞤮 𞤅𞤫𞥅𞤪𞤭⹁ 𞤱𞤮𞤲𞤭 𞤳𞤮 𞤧𞤭𞤲𞤷𞤭 𞤼𞤵𞤬𞤵𞤲𞤤𞤫 𞤊𞤵𞤺𞤵𞤲𞤦𞤢𞥄 𞤫 𞤚𞤭𞤥𞤦𞤮. 𞤀𞤬𞤮 𞤮𞤲⹁ 𞤅𞤫𞥅𞤪𞤭 𞤥𞤮 𞤺𞤫𞤴𞤲𞤺𞤮𞤤 𞤧𞤫𞥅𞤪𞤭𞤴𞤢𞥄𞤩𞤫 𞤩𞤫𞤲 𞤴𞤢𞤤𞤼𞤭 𞤫 𞤥𞤵𞤵𞤲⹁ 𞤸𞤮𞤯𞤭 𞤊𞤵𞤺𞤵𞤲𞤦𞤢𞥄. 𞤅𞤫𞤴𞤣𞤭⹁ 𞤥𞤢𞥄𞤥𞤢 𞤧𞤫𞤴𞤣𞤭𞤴𞤢𞥄𞤩𞤫 𞤩𞤫𞤲⹁ 𞤸𞤮𞤯𞤭 𞤚𞤭𞤥𞤦𞤮.
𞤄𞤢𞥄𞤦𞤢 𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞥅𞤥𞤢 𞤅𞤢𞤥𞤦𞤫𞥅𞤺𞤵 𞤬𞤫𞤰𞥆𞤭𞤲𞤭⹁ 𞤼𞤢𞤱𞤭 𞤳𞤮 𞤥𞤮 𞤮 𞤣𞤵𞥅𞤩𞤭 𞤶𞤮𞤱𞤭. 𞤑𞤮 𞤣𞤫𞤱𞤮𞤤 𞤥𞤢𞤳𞥆𞤮 𞤲𞤺𞤮𞤤 𞤚𞤵𞤲𞤳𞤢𞤲 𞤲𞤫𞤭 𞤥𞤮. 𞤘𞤫𞤲𞤮 𞤲𞤮 𞤮𞤳𞥆𞤵𞤲𞤮𞥅 𞤥𞤮 𞤸𞤢𞤳𞥆𞤭𞤤 𞤼𞤭𞤥𞥆𞤵𞤳𞤭. 𞤇𞤢𞤴𞤼𞤭 𞤮 𞤥𞤢𞤱𞤲𞤭𞥅⹁ 𞤮 𞤸𞤫𞤩𞤭𞥅 𞤣𞤵𞥅𞤩𞤭 𞤧𞤫𞥅𞤯𞤢⹁ 𞤮 𞤫𞤺𞥆𞤭 𞤮 𞤭𞤱𞤭 𞤚𞤵𞤲𞤳𞤢𞤲 𞤮 𞤴𞤢𞤸𞤭 𞤇𞤵𞤪𞤭𞤴𞤢𞥄 𞤬𞤭𞥅 𞤶𞤢𞤲𞤺𞤵𞤺𞤮𞤤 𞤧𞤫𞤤𞥆𞤵𞤳𞤢⹁ “𞤬𞤭𞤹𞤸𞤵” 𞤃𞤢𞥄𞤤𞤭𞤳𞤭⹁ 𞤬𞤭𞤲𞤣𞤫 𞤢𞥃𞤢𞤪𞤭𞥅 𞤫 𞤧𞤵𞥅𞤬𞤭 𞤹𞤢𞤣𞤢𞤪𞤭𞥅. 𞤌 𞤶𞤢𞤲𞤺𞤭 𞤗𞤵𞤪𞥇𞤢𞥄𞤲𞤢 𞤫 𞤸𞤢𞤣𞤭𞥅𞤧𞤫 𞤤𞤫𞤴 𞤳𞤮𞤴𞤯𞤫 𞤕𞤫𞤪𞤲𞤮 𞤅𞤢𞤥𞤦𞤢 𞤥𞤮 𞤇𞤵𞤪𞤭𞤴𞤢𞥄. 𞤌 𞤧𞤢𞤳𞥆𞤭𞤼𞤮𞤪𞤭 𞤩𞤫𞤴𞤣𞤭𞤪𞤮𞤴𞤺𞤮𞤤 𞤺𞤢𞤲𞤣𞤢𞤤 𞤸𞤫𞤣𞥆𞤫 𞤑𞤮𞤤𞤫𞤲 𞤫 𞤶𞤵𞥅𞤯𞤫 𞤕𞤫𞤪𞤲𞤮 𞤀𞤤𞤬𞤢𞥄 𞤘𞤵𞤪𞤯𞤮. 𞤇𞤢𞥄𞤱𞤼𞤭 𞤯𞤵𞤥⹁ 𞤮 𞤢𞤪𞤼𞤭 𞤚𞤭𞤥𞤦𞤮 𞤼𞤢𞤱𞤭 𞤮 𞤬𞤢𞤴𞤼𞤭𞤲𞤭𞤳𞤫. 𞤖𞤢𞤴 𞤕𞤫𞤪𞤲𞤮 𞤅𞤮𞤪𞤭⹁ 𞤣𞤫𞤲𞤯𞤵 𞤥𞤢𞤳𞥆𞤮 𞤢𞤲𞤣𞤭𞤼𞤢𞥄𞤤𞤭 𞤥𞤮.
𞤇𞤢𞤴𞤼𞤭 𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞥅𞤥𞤢 𞤅𞤢𞤥𞤦𞤫𞥅𞤸𞤵 𞤢𞤪𞤼𞤭𞥅 𞤚𞤭𞤥𞤦𞤮⹁ 𞤩𞤫 𞤧𞤫𞥅𞤲𞤭𞥅 𞤬𞤫𞤤𞥆𞤮 𞤖𞤫𞤤𞥆𞤢𞤴𞤢𞥄𞤩𞤫. 𞤇𞤫 𞤱𞤮𞤲𞤭 𞤼𞤮𞤲 𞤣𞤵𞥅𞤩𞤭 𞥗⹁ 𞤤𞤫𞤦𞥆𞤭 𞥗⹁ 𞤶𞤮𞤲𞤼𞤫 𞥗⹁𞤦𞤢𞥄𞤤𞤯𞤫 𞥗. 𞤚𞤢𞤱𞤭 𞤯𞤵𞤥 𞤬𞤮𞤨 𞤸𞤭𞤩𞤫 𞤸𞤮𞥅𞤪𞤭⹁ 𞤩𞤫 𞤶𞤵𞥅𞤤𞤢⹁ 𞤩𞤫 𞤱𞤭𞤪𞤣𞤮𞥅⹁ 𞤩𞤫 𞤼𞤮𞤪𞤮𞥅 𞤀𞤤𞤤𞤢 𞤴𞤮 𞤩𞤢𞤥𞤼𞤵 𞤣𞤭𞥅𞤲𞤢 𞤭𞤧𞤤𞤢𞥄𞤥𞤵 𞤳𞤢𞤲 𞤫 𞤲𞤣𞤫𞤪 𞤊𞤵𞥅𞤼𞤢 𞤔𞤢𞤤𞤮𞥅.
𞤖𞤌𞤂 𞤐𞤌 𞤊𞤓𞥅𞤚𞤀 𞤊𞤉𞤏𞤁𞤌𞤈𞤐𞤌𞥅؟
𞤍𞤮𞥅 𞤲𞤣𞤫 𞤫𞤲 𞤶𞤮𞤳𞥆𞤭𞤲𞤣𞤭𞤪𞤢⹁ 𞤴𞤫𞤱𞤼𞤫𞤲 𞤧𞤫𞥅𞤯𞤢 𞤲𞤮 𞤊𞤵𞥅𞤼𞤢 𞤬𞤫𞤱𞤣𞤮𞤪𞤲𞤮𞥅. 𞤐𞤣𞤫 𞤚𞤭𞤥𞤦𞤮 𞤫 𞤊𞤵𞤺𞤵𞤲𞤦𞤢𞥄 𞤧𞤭𞤲𞤷𞤫𞤼𞤫𞤲𞤮𞥅 𞤶𞤵𞤤𞤩𞤫 𞤩𞤫𞤲 𞤸𞤢𞤪𞤭 𞤳𞤮 𞤷𞤢𞥄𞤥𞤢𞤼𞤮𞤴. 𞤐𞤣𞤫 𞤣𞤵𞥅𞤩𞤭 𞤧𞤫𞥅𞤯𞤢 𞤬𞤫𞤰𞥆𞤵𞤲𞤮𞥅⹁ 𞤀𞤤𞤢 𞤬𞤵𞤯𞥆𞤭 𞤶𞤢𞥄𞤦𞤭𞤲𞤣𞤺𞤮𞤤 𞤼𞤮𞤪𞤢𞥄𞤪𞤫 𞤲𞤣𞤫 𞤩𞤫 𞤱𞤢𞤯𞤵𞤲𞤮𞥅 𞤲𞤣𞤫𞤲. 𞤇𞤫𞥅 𞤤𞤢𞥄𞤼𞤭𞤲𞤮𞥅𞤩𞤫 𞤸𞤢𞤪𞤭 𞤳𞤮 𞤧𞤫𞥅𞤯𞤢𞥄𞤩𞤫⹁ 𞤱𞤮𞤲𞤼𞤭 𞤺𞤵𞤤𞤵𞥅𞤶𞤫 𞤺𞤵𞤤𞤵𞥅𞤶𞤫. 𞤊𞤵𞤤𞤩𞤫 𞤃𞤢𞥄𞤧𞤭𞤲𞤢𞥄𞤩𞤫 𞤩𞤫𞤲 𞤬𞤵𞤯𞥆𞤭𞥅 𞤢𞤪𞤵𞤺𞤮𞤤 𞤢𞤪𞤣𞤢 𞤫 𞤶𞤢𞤱𞤤𞤫 𞤥𞤢𞤩𞥆𞤫 𞤧𞤢𞤦𞤵 𞤱𞤮𞥅𞤣𞤫𞥅𞤣𞤫 𞤲𞤣𞤭𞤴𞤢𞤥 𞤫 𞤻𞤢𞥄𞤥𞤫𞤼𞤫𞥅 𞤫 𞤲𞤮𞤳𞥆𞤵𞥅𞤪𞤫 𞤲𞤣𞤫𞤲. 𞤑𞤮𞤲𞤮 𞤬𞤫𞤱𞤲𞤣𞤮 𞤲𞤣𞤫𞥅𞤲 𞤼𞤵𞤥𞤢𞥄𞤪𞤫⹁ 𞤼𞤢𞤱𞤭 𞤸𞤫𞥅𞤬𞤫𞤪𞤩𞤫 𞤩𞤫𞤲 𞤲𞤮 𞤼𞤢𞤥𞤨𞤭𞤲𞥆𞤮𞥅 𞤩𞤫 𞤳𞤮 𞤧𞤭𞤬𞤮𞤼𞤢𞥄𞤳𞤮.
𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞥅𞤥𞤢 𞤱𞤢𞤯𞤼𞤢𞤲𞤭 𞤴𞤭𞥅𞤤𞤭 𞤫 𞤷𞤢𞤯𞤫𞥅𞤤𞤫 𞤯𞤫 𞤶𞤵𞥅𞤤𞤩𞤫 𞤩𞤫𞤲 𞤼𞤮𞤲𞤣𞤭𞤲𞤮𞥅 𞤶𞤵𞥅𞤯𞤫 𞤸𞤫𞥅𞤬𞤫𞤪𞤩𞤫 𞤩𞤫𞤲. 𞤇𞤫 𞤱𞤮𞤲𞤭 𞤚𞤭𞤥𞤦𞤮 𞤩𞤫 𞤱𞤭𞤲𞤣𞤭 𞤩𞤢𞤼𞤢𞥄𞤳𞤭 𞤩𞤫 𞤲𞤫𞤤𞤣𞤭 𞤢𞤬𞤤𞥇𞤢𞤥𞤩𞤫 𞤳𞤮𞤯𞤮𞥅𞤤𞤭 𞤶𞤫𞥅𞤺𞤮𞤮 𞤬𞤭𞥅 𞤴𞤮 𞤩𞤫 𞤼𞤵𞤥𞤦𞤮𞤲𞥋𞤣𞤭𞤪 𞤩𞤫 𞤰𞤫𞤼𞥆𞤢 𞤨𞤫𞤸𞤫 𞤲𞤮 𞤩𞤫 𞤸𞤭𞤱𞤭𞤼𞤮𞤪𞤢⹁ 𞤫 𞤲𞤮 𞤩𞤫 𞤣𞤢𞤪𞤼𞤮𞤪𞤢 𞤸𞤫𞥅𞤬𞤫𞤪𞤩𞤫 𞤩𞤫𞤲. 𞤇𞤫𞥅𞤲 𞤶𞤫𞥅𞤺𞤮𞤮⹁ 𞤼𞤢𞤱𞤼𞤭 𞤳𞤢𞤥𞤩𞤫⹁ 𞤩𞤫 𞤱𞤮𞤲𞤭𞥅 𞤲𞤶𞤫𞥅𞤯𞤭𞤯𞤮⹁ 𞤩𞤫 𞤼𞤵𞤥𞤦𞤮𞤲𞥋𞤣𞤭𞤪𞤭 𞤩𞤫 𞤴𞤫𞤱𞤼𞤭⹁ 𞤩𞤫 𞤱𞤢𞤯𞤭 𞤫𞤩𞥆𞤮𞥅𞤶𞤫. 𞤀𞤲𞤣𞤭𞤲𞤼𞤭𞤲𞤫𞤲 𞤣𞤭𞥅𞤱𞤫 𞤯𞤭𞤯𞤭⹁ 𞤯𞤫𞤲 𞤳𞤮 𞤊𞤮𞤣𞤫 𞤖𞤢𞤶𞥆𞤭 𞤫 𞤳𞤫𞥅𞤦𞤢𞥄𞤤𞤭 𞤼𞤢𞤱𞤲𞤢𞤲𞤮 𞤬𞤭𞥅 𞤴𞤮 𞤯𞤫 𞤬𞤮𞤱 𞤴𞤮 𞤯𞤫 𞤱𞤮𞤲𞤵 𞤶𞤫𞥅𞤲𞤢𞤴𞤭.
𞤇𞤢𞤴 𞤩𞤫 𞤬𞤫𞤱𞤶𞤮𞤣𞤭𞥅⹁ 𞤩𞤫 𞤥𞤮𞥅𞤩𞤭 𞤶𞤢𞤱𞤤𞤫⹁ 𞤩𞤫 𞤴𞤢𞤸𞤭 𞤫 𞤤𞤫𞤴𞤯𞤫 𞤳𞤢𞤱𞤼𞤫 𞤥𞤢𞤩𞥆𞤫 𞤱𞤢𞤲𞤮 𞤊𞤵𞥅𞤼𞤢 𞤚𞤮𞥅𞤪𞤮 𞤫 𞤅𞤢𞤪𞤤𞤮𞤲 𞤩𞤫 𞤧𞤮𞥅𞤣𞤭 𞤨𞤵𞤷𞥆𞤭 𞤫 𞤨𞤭𞤲𞤳𞤢. 𞤈𞤫𞤬𞤭𞤼 𞤩𞤫 𞤥𞤮𞥅𞤩𞤭 𞤳𞤮𞤲𞤵 𞤥𞤮𞥅𞤤𞤢𞤲𞤢𞥄𞤲𞤺𞤵. 𞤁𞤫𞤲𞤯𞤵 𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞥅𞤥𞤢 𞤅𞤢𞤥𞤦𞤫𞥅𞤺𞤵 𞤢𞤪𞤣𞤭𞤲𞤢𞥄 𞤸𞤮𞥅𞤪𞤫 𞤳𞤮𞤲𞤵 𞤲𞤺𞤵𞤲. 𞤇𞤫 𞤸𞤢𞤩𞤭 𞤸𞤫𞥅𞤬𞤫𞤪𞤩𞤫 𞤩𞤫𞤲 𞤦𞤢𞥄𞤤𞤯𞤫 𞤶𞤫𞥅𞤯𞤭𞤯𞤭. 𞤍𞤵𞤥 𞤤𞤵𞤼𞥆𞤢𞥄 𞤥𞤢𞥄𞤣𞤫𞥅𞤲𞤣𞤫𞥅 𞤫 𞤲𞤣𞤫𞤪 𞤨𞤫𞤰𞥆𞤭 𞤊𞤵𞥅𞤼𞤢⹁ 𞤬𞤮𞤤𞤺𞤮 𞤲𞤺𞤮𞤲 𞤲𞤮𞤣𞥆𞤢𞥄 𞤚𞤢𞤤𞤢𞤲𞤧𞤢𞤲.
𞤇𞤀𞥄𞤏𞤌 𞤚𞤀𞤂𞤀𞤐𞤅𞤀𞤐
𞤇𞤢𞤴 𞤸𞤢𞤪𞤫 𞤯𞤫𞤲 𞤺𞤢𞤧𞤭𞥅⹁ 𞤺𞤮𞥅𞤼𞤮 𞤳𞤢𞤤𞤢 𞤫 𞤢𞤬𞤤𞤢𞤥𞤩𞤫 𞤣𞤭𞥅𞤱𞤫𞥅 𞤯𞤫𞤲 𞤶𞤫𞥅𞤲𞤢𞤴𞤭 𞤴𞤭𞤤𞤼𞤭𞤼𞤭𞥅 𞤳𞤢 𞤼𞤵𞥅𞤬𞤵𞤲𞤣𞤫 𞤥𞤵𞤵𞤲. 𞤑𞤢𞤪𞤢𞤥𞤮𞤳𞤮 𞤀𞤤𞤬𞤢𞥄 𞤱𞤭𞤲𞤣𞤭 𞤩𞤢𞤼𞤢𞥄𞤳𞤭 𞤧𞤢𞥄𞤳𞤭𞤼𞤭 𞤬𞤭𞥅 𞤴𞤮 𞤩𞤫 𞤬𞤮𞤼𞥆𞤭𞤼𞤵 𞤳𞤢 𞤕𞤫𞤪𞤲𞤮 𞤅𞤵𞤤𞤢𞤴𞤥𞤢𞥄𞤲𞤢 𞤚𞤭𞤥𞤦𞤭 𞤚𞤵𞤲𞥆𞤭. 𞤊𞤢𞥄𞤲𞤣𞤢𞥄𞤪𞤫 𞤲𞤺𞤢𞥄𞤤 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤳𞤮 𞤧𞤵𞤩𞤢𞤺𞤮𞤤 𞤢𞤤𞤥𞤢𞥄𞤥𞤭𞥅𞤶𞤮 𞤥𞤢𞤱𞤲𞤯𞤮 𞤊𞤵𞥅𞤼𞤢 𞤔𞤢𞤤𞤮𞥅 𞤮𞤲. 𞤍𞤵𞤥 𞤳𞤮 𞤸𞤵𞥅𞤲𞤣𞤫 𞤲𞤣𞤫 𞤱𞤫𞤤𞤢𞥄𞤲𞤮 𞤬𞤭𞥅 𞤸𞤢𞤳𞥆𞤵𞤲𞤣𞤫 𞤥𞤢𞤩𞥆𞤫 𞤫 𞤕𞤫𞤪𞤲𞤮 𞤅𞤵𞤤𞤢𞤴𞤥𞤢𞥄𞤲𞤢. 𞤑𞤮𞤲𞤮 𞤀𞤤𞤬𞤢𞥄 𞤅𞤫𞤤𞥆𞤵 𞤂𞤢𞤦𞤫 𞤱𞤢𞤯𞤭 𞤻𞤫𞥅𞤻𞤢𞤤 𞤱𞤫𞥅𞤪𞤲𞤭 𞤬𞤮𞤱 𞤸𞤢𞥄 𞤸𞤫𞤣𞥆𞤭𞥅 𞤲𞤣𞤢𞤯𞥆𞤵𞤣𞤭 𞤱𞤮𞥅𞤼𞤭𞤪𞤭⹁ 𞤴𞤫𞥅𞤧𞤮𞥅𞤪𞤭 𞤲𞤣𞤭𞤲⹁ 𞤮 𞤲𞤫𞥅𞤩𞤲𞤭𞤼𞤭 𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞥅𞤥𞤢 𞤅𞤢𞤥𞤦𞤫𞥅𞤺𞤵 (𞤑𞤢𞤪𞤢𞤥𞤮𞤳𞤮 𞤀𞤤𞤬𞤢𞥄) 𞤬𞤭𞥅 𞤴𞤮 𞤩𞤫 𞤧𞤢𞤳𞥆𞤭𞤼𞤮 𞤲𞤢𞥄𞤼𞤵𞤺𞤮𞤤 𞤩𞤫 𞤸𞤢𞤱𞤪𞤢 𞤫 𞤲𞤣𞤫𞥅𞤲 𞤱𞤫𞥅𞤪𞤣𞤫. 𞤌 𞤱𞤭𞥅 𞤴𞤮 𞤲𞤣𞤢𞥄𞤪𞤫𞥅 𞤳𞤢𞤣𞤭 𞤳𞤮 𞤸𞤮𞤥𞤦𞤮 𞤰𞤫𞤤𞥆𞤭𞤼𞤭𞥅 𞤫 𞤬𞤢𞤲𞥆𞤵𞥅𞤶𞤭 𞤯𞤭𞤲 𞤺𞤢𞤲𞤣𞤢𞤤 𞤯𞤭𞤲 𞤶𞤫𞥅𞤯𞤭𞤯𞤭⹁ 𞤬𞤮𞤱 𞤼𞤢𞤱𞤭 𞤳𞤮 𞤫 𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞥅𞤥𞤢. 𞤐𞤣𞤫𞤲⹁ 𞤩𞤫 𞤤𞤢𞥄𞤥𞥆𞤭𞤲𞤢𞥄 𞤸𞤮𞥅𞤪𞤫 𞤊𞤵𞥅𞤼𞤢.
𞤇𞤫 𞤤𞤢𞥄𞤥𞤭𞥅 𞤊𞤵𞥅𞤼𞤢 𞤫 𞤲𞤣𞤫𞤪 𞤣𞤵𞥅𞤩𞤭 𞤲𞤮𞥅𞤺𞤢𞤴. 𞤉 𞤲𞤣𞤫𞤪 𞤯𞤭𞥅𞤲 𞤣𞤵𞥅𞤩𞤭⹁ 𞤩𞤫 𞤱𞤢𞤯𞤭𞥅 𞤸𞤢𞤪𞤫 𞥑𞥙 𞤬𞤭𞥅 𞤼𞤢𞤦𞤭𞤲𞤼𞤭𞤲𞤺𞤮𞤤 𞤲𞤣𞤭𞤥𞤢𞥄𞤺𞤵 𞤫 𞤳𞤭𞤧𞤢𞤤 𞤲𞤣𞤫𞤪 𞤊𞤵𞥅𞤼𞤢 𞤔𞤢𞤤𞤮𞥅. 𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞥅𞤥𞤢 𞤅𞤢𞤥𞤦𞤫𞥅𞤺𞤵𞤲𞤮 𞤰𞤢𞥄𞤲𞤢𞤲𞥆𞤮 𞤤𞤢𞥄𞤥𞤵⹁ 𞤸𞤭𞤩𞤫 𞤴𞤢𞥄𞤸𞤵𞤲𞤮𞥅 𞤶𞤵𞥅𞤯𞤫 𞤬𞤮𞤼𞤢. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥗𞥕𞥑 𞤩𞤫 𞤬𞤫𞤰𞥆𞤭𞤲𞤭 𞤚𞤭𞤥𞤦𞤮. 𞤇𞤢𞤴𞤼𞤭 𞤩𞤫 𞤬𞤫𞤰𞥆𞤭𞤲𞤭𞥅⹁ 𞤤𞤮𞤲𞤼𞤢𞤺𞤮𞤤 𞤩𞤫 𞤸𞤮𞤴𞤢𞥄𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤩𞤭𞤯𞥆𞤮 𞤥𞤢𞤩𞥆𞤫 𞤮𞤲 𞤼𞤮𞥅𞤱𞤢𞥄𞤤𞤭 𞤣𞤵𞥅𞤩𞤭. 𞤖𞤢𞤪𞤭 𞤮𞥅𞤲 𞤳𞤮 𞤣𞤵𞥅𞤩𞤭 𞥑𞥖 𞤸𞤫𞤩𞤭. 𞤇𞤢𞥄𞤱𞤮 𞤩𞤫 𞤼𞤢𞤧𞤳𞤢𞥄𞤣𞤫 𞤲𞤣𞤵𞥅 𞤥𞤵𞤪𞤢𞥄𞤣𞤵 𞤫 𞤳𞤮 𞤬𞤫𞤱𞤣𞤭𞤲𞤮𞥅 𞤳𞤮𞤲⹁ 𞤩𞤫 𞤬𞤮𞤼𞥆𞤢𞤲𞤭 𞤴𞤮 𞤣𞤫𞤲𞤯𞤭𞤪𞤢𞥄𞤱𞤮 𞤥𞤢𞤳𞥆𞤮⹁ 𞤮𞥅𞤲 𞤳𞤮 𞤀𞤤𞤥𞤢𞥄𞤥𞤭 𞤅𞤮𞤪𞤭 𞤃𞤢𞤱𞤲𞤯𞤮⹁ 𞤴𞤮 𞤤𞤮𞤲𞤼𞤮 𞤳𞤫𞤲𞤫𞤲𞤼𞤭. 𞤑𞤮 𞤺𞤭𞤦𞤭 𞤮𞤲𞤼𞤵𞤥𞤢 𞤤𞤮𞤲𞤼𞤮𞤲𞥋𞤣𞤭𞤪𞤢𞤤 𞤲𞤺𞤢𞤤 𞤬𞤵𞤯𞥆𞤭 𞤸𞤢𞤳𞥆𞤵𞤲𞤣𞤫 𞤅𞤮𞤪𞤭𞤴𞤢𞥄 𞤫 𞤀𞤤𞤬𞤢𞥄𞤴𞤢𞥄.