𞤂𞤓𞥅𞤂𞤀 𞤬𞤮𞥅𞤤𞤭𞥅 𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌

𞤂𞤓𞥅𞤂𞤀 𞤬𞤮𞥅𞤤𞤭𞥅 𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌⹁ 𞤮 𞤤𞤢𞥄𞤥𞥆𞤭𞤲𞤼𞤭𞤲𞤢𞥄𞤥𞤢 𞤸𞤮𞥅𞤪𞤫 𞤤𞤫𞤴𞤣𞤭 𞤄𞤀𞤈𞤀𞥄𞤅𞤋𞤂 𞤲𞤣𞤭𞤲.

𞤖𞤢𞤲𞤳𞤭 𞤫 𞤈𞤫𞤬𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥒𞥕 𞤒𞤢𞤪𞤳𞤮 𞥒𞥐𞥒𞥖⹁ 𞤂𞤓𞤏𞤋𞥅𞤅 𞤋𞤐𞤀𞤅𞤋𞤒𞤌 𞤂𞤓𞥅𞤂𞤀 𞤁𞤀 𞤅𞤋𞤂𞤜𞤀 𞤧𞤵𞤬𞤼𞤢𞤲𞤢𞥄𞤥𞤢 𞤳𞤢𞤣𞤭 𞤬𞤭𞥅 𞤤𞤢𞥄𞤼𞤢𞤺𞤮𞤤 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤄𞤀𞤈𞤀𞥄𞤅𞤋𞤂 𞤲𞤣𞤭𞤲 𞤬𞤭𞥅 𞤣𞤵𞥅𞤩𞤭 𞤲𞤢𞤴𞤭.

𞤉 𞤷𞤵𞤬𞤼𞤢𞤤 𞤽𞤢𞤯𞤵𞤲’𞤺𞤢𞤤 𞤬𞤮𞤼𞤢⹁ 𞤣𞤵𞤪𞤱𞤮𞥅𞤱𞤮 𞤲𞤢𞤲𞤮 𞤮𞤲⹁ 𞤱𞤮𞤲𞤵𞤲𞤮𞥅𞤯𞤮 𞤯𞤢𞤩𞥆𞤵𞤣𞤫 𞤸𞤢𞤨𞥆𞤵 𞤲𞤢𞤴𞤢𞤩𞤵⹁ 𞤬𞤮𞥅𞤤𞤭𞥅 𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌⹁ 𞤤𞤭𞤣𞥆𞤮 𞤥𞤢𞤳𞥆𞤮 𞤧𞤫𞤩𞤭𞤼𞤭𞥅𞤯𞤮 𞤻𞤢𞥄𞤥𞤮. 𞤉 𞤳𞤮𞤲𞤺𞤮𞤤 𞤻𞤢𞥄𞤱𞤭𞤪𞤣𞤵 𞤷𞤵𞤬𞤼𞤫 𞤯𞤫𞤲⹁ 𞤂𞤓𞥅𞤂𞤀𞥄 𞤸𞤫𞤩𞤭𞥅 %𞥕𞥑⹁𞥗𞥙 𞤫 𞤷𞤵𞤬𞤼𞤫 𞤯𞤫𞤲 𞤩𞤢𞥄𞤱𞤮 𞤤𞤭𞤥𞤼𞤮 𞤩𞤢𞤣𞤭𞥅𞤲𞤺𞤮 𞤼𞤭𞤥𞥆𞤵𞤺𞤮𞤤⹁ 𞤤𞤭𞤣𞥆𞤵 %𞥔𞥘⹁𞥒𞥑 𞤱𞤮𞤲𞤢𞤲𞤣𞤫 𞤮𞥅 𞤩𞤭𞤯𞥆𞤮 𞤔𞤀𞤒𞤋𞤈 𞤄𞤌𞤂𞤅𞤌𞤐𞤀𞤈𞤌⹁ 𞤤𞤢𞥄𞤼𞤭𞥅𞤲𞤮𞥅𞤯𞤮 𞤮𞤲 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲.

𞤑𞤢 𞤳𞤭𞥅𞤳𞤭𞥅𞤯𞤫𞥅𞤪𞤫⹁ 𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤮 𞤤𞤢𞤲𞤣𞤮𞤼𞤮 𞤴𞤮 “𞤷𞤵𞤬𞤼𞤫 𞤯𞤫𞤲 𞤦𞤮𞤪𞤼𞤫”.

𞤑𞤢 𞤧𞤢𞤳𞥆𞤭𞤼𞤮𞤪𞤵𞤲⹁ 𞤄𞤀𞤈𞤀𞥄𞤅𞤋𞤂 𞤱𞤢𞤴𞤤𞤭𞤼𞤮𞤪𞤢𞥄𞤤𞤭 𞤼𞤮 𞤦𞤢𞤲𞤽𞤫 𞤻𞤢𞥄𞤥𞤮 𞤱𞤢𞤲𞤮 𞤀𞤈𞤔𞤀𞤐𞤚𞤋𞤐𞤀⹁ 𞤕𞤋𞤂𞤋 𞤥𞤢𞤤𞥆𞤢 𞤑𞤌𞤂𞤌𞤃𞤄𞤋𞤒𞤀⹁ 𞤤𞤫𞤴𞤯𞤫 𞤯𞤫 𞤁𞤌𞤐𞤀𞤂𞤁 𞤚𞤌𞤈𞤌𞤃𞤆𞤓⹁𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤀𞤥𞤫𞤪𞤭𞤳 𞤲𞤣𞤭𞤲⹁ 𞤱𞤮𞤲𞤢𞤲𞤭. 𞤄𞤀𞤈𞤀𞥄𞤅𞤋𞤂 𞤤𞤵𞤼𞥆𞤭𞥅 𞤱𞤮𞤲𞤵𞤣𞤫 𞤴𞤮𞤺𞤢 𞤫 𞤣𞤢𞤪𞤼𞤮𞤪𞤯𞤫 𞤃𞤵𞥅𞤼𞤢𞤲𞤳𞤢𞥄𞤳𞤵 𞤸𞤫𞤣𞥆𞤫 𞤀𞤥𞤫𞤪𞤭𞤳 𞤂𞤢𞤼𞤫𞤲𞤪𞤭. 𞤇𞤢𞥄𞤱𞤮 𞤮 𞤸𞤫𞤩𞤵𞤣𞤫 %𞥕𞥑⹁𞥗𞥙 𞤤𞤭𞤣𞥆𞤵 %𞥔𞥘⹁𞥒𞥑 𞤱𞤮𞤲𞤢𞤲𞤣𞤫 𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌⹁ 𞤼𞤫𞤳𞤵𞥅𞤶𞤮 𞤼𞤢𞤦𞤭𞤴𞤢𞤲𞤳𞤫𞥅𞤶𞤮 𞤮𞤲⹁ 𞤮𞥅 𞤩𞤮𞤴𞤥𞤢𞥄𞤶𞤮 𞤬𞤫𞤲𞤭𞤲𞤭𞥅 𞤳𞤭𞥅𞤼𞤭 𞤯𞤭𞤲 𞤬𞤮𞤨.

𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤄𞤀𞤈𞤀𞥄𞤅𞤋𞤂 𞤲𞤢𞤲𞤮𞤴𞤢𞤲𞤳𞤫𞥅𞤶𞤮 𞤮𞤲 𞤸𞤮𞤤𞥆𞤭𞥅 𞤫 𞤈𞤫𞤬𞤭𞤦𞤭𞤪𞥆?⹁ 𞤩𞤢𞥄𞤱𞤮 𞤮 𞤧𞤵𞤬𞤼𞤢𞤲𞤫𞥅𞤣𞤫 𞤬𞤭𞥅 𞤸𞤮𞥅𞤪𞤢𞤺𞤮𞤤 𞤳𞤢𞤣𞤭⹁ 𞤱𞤮𞤲𞤣𞤫𞤥𞤢 𞤄𞤢𞤪𞤢𞥄𞤧𞤭𞤤𞤲𞤢𞥄𞤩𞤫 𞤩𞤫𞤲 “𞤴𞤢𞤸𞤵𞤲𞤮 𞤧𞤵𞤬𞤼𞤭 𞤧𞤢𞤦𞤵 𞤱𞤢𞥄𞤱𞤵𞤺𞤮𞤤 𞤢𞤥𞤫𞤲 𞤸𞤮𞤤𞥆𞤵𞤺𞤮𞤤 𞤩𞤫 𞤱𞤮𞤲𞤣𞤫𞤥𞤢 𞤷𞤵𞤬𞤼𞤢𞤤 𞤲𞤺𞤢𞤤 𞤲𞤮 𞤸𞤭𞤼𞥆𞤭 𞤧𞤢𞤲𞥆𞤫 𞤬𞤭𞥅 𞤼𞤢𞤦𞤭𞤲𞤼𞤭𞤲𞤺𞤮𞤤 𞤣𞤫𞤥𞤮𞤳𞤢𞤪𞤢𞥄𞤳𞤵 𞤲𞤺𞤵𞤲”. 𞤉 𞤲𞤣𞤫𞤪 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤢𞤪𞤢𞤲𞤫𞤪𞤫 𞤲𞤣𞤫𞤲 𞤩𞤢𞥄𞤱𞤮 𞤦𞤮𞤼𞤫 𞤯𞤫𞤲 𞤩𞤢𞤲𞤣𞤭𞤲𞤫𞥅𞤣𞤫⹁ 𞤮 𞤩𞤫𞤴𞤣𞤭 𞤱𞤮𞤲𞤣𞤫𞤥𞤢 𞤧𞤵𞤬𞤼𞤮𞥅𞤩𞤫 𞤩𞤫𞤲 𞤬𞤮𞥅𞤤𞤭𞥅 “𞤴𞤮𞤤𞥆𞤭𞤼𞤢𞥄𞤪𞤫” 𞤲𞤶𞤵𞤩𞥆𞤵𞤤𞤫 𞤤𞤭𞤥𞤭𞤴𞤢𞤲𞤳𞤮𞥅𞤶𞤫 𞤯𞤫𞤲⹁ 𞤪𞤫𞤬𞤼𞤭 𞤮 𞤬𞤮𞤣𞤭 𞤱𞤮𞤲𞤣𞤫 𞤮 “𞤲𞤫𞤢𞤴” 𞤯𞤫.

𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌 𞤲𞤮 𞤤𞤢𞤲𞤣𞤭𞥅 “𞤦𞤮𞤪𞤼𞤵𞤺𞤮𞤤 𞤷𞤵𞤬𞤼𞤫 𞤯𞤫𞤲”
𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌⹁ 𞤣𞤵𞤪𞤱𞤮𞥅𞤱𞤮 𞤼𞤢𞤦𞤭𞤴𞤢𞤲𞤳𞤫𞥅𞤶𞤮 𞤮𞤲 (conservateur) 𞤸𞤮𞤤𞥆𞤭𞤼𞤭𞥅 𞤫 𞤈𞤫𞤬𞤦𞤭𞤪𞥆𞤫 𞤱𞤮𞤲𞤣𞤫𞤥𞤢 𞤮 𞤤𞤢𞤲𞤣𞤮𞤼𞤮 𞤴𞤮 “𞤷𞤵𞤬𞤼𞤫 𞤯𞤫𞤲 𞤥𞤫𞤸𞤫”⹁ 𞤩𞤢𞥄𞤱𞤮 𞤬𞤮𞥅𞤤𞤫𞥅𞤣𞤫 𞤥𞤢𞤳𞥆𞤮 𞤴𞤫𞥅𞤧𞤮 𞤂𞤓𞥅𞤂𞤀. 𞤌 𞤱𞤭𞤴𞤭 𞤳𞤢 𞤤𞤢𞥄𞤥𞤮𞤪𞤣𞤫 𞤄𞤢𞤪𞤢𞤧𞤭𞤤𞤭𞤴𞤢 “𞤕𞤵𞤬𞤼𞤫 𞤯𞤫𞤲 𞤱𞤢𞥄𞤱𞤫𞤼𞤢𞥄𞤳𞤫 𞤶𞤢𞤩𞤫𞥅𞤣𞤫”. 𞤉 𞤥𞤭𞥅𞤶𞤮 𞤥𞤢𞤳𞥆𞤮⹁ “𞤲𞤮 𞤤𞤵𞤼𞥆𞤭 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤸𞤢𞥄𞤲𞤢𞥄𞤯𞤭 𞤤𞤢𞥄𞤩𞥆𞤭𞤲𞤫𞥅𞤣𞤫” 𞤩𞤢𞥄𞤱𞤮 𞤨𞤮𞥅𞤯𞤮𞤲𞥋𞤣𞤭𞤪𞤢𞤤 𞤧𞤢𞤪𞤭𞤴𞤢𞤴𞤢𞤲𞤳𞤮𞤱𞤢𞤤 𞤱𞤮𞤲𞤵𞤲𞥋𞤺𞤢𞤤 𞤧𞤢𞤦𞤵 𞤷𞤵𞤬𞤼𞤫 𞤯𞤫𞤲 𞤲𞤫𞥅𞤩𞤼𞤭𞤲𞤫𞥅𞤣𞤫.

𞤑𞤢 𞤮 𞤩𞤢𞤣𞤭𞥅 𞤯𞤮𞥅 𞤣𞤵𞥅𞤩𞤭 𞥘𞥑⹁ 𞤂𞤓𞥅𞤂𞤀 𞤲𞤮 𞤱𞤢𞤯𞤵𞤣𞤫 𞤶𞤭𞤨𞥆𞤭𞤪𞤮 𞤥𞤢𞤳𞥆𞤮 𞤧𞤢𞤳𞥆𞤭𞤼𞤭𞥅𞤲𞤺𞤮 𞤲𞤺𞤮𞤲. 𞤌𞥅 𞤖𞤮𞥅𞤪𞤫𞥅𞤶𞤮 𞤣𞤢𞤪𞤭𞥅𞤯𞤮 𞤳𞤢𞤣𞤭 𞤢𞤪𞤣𞤭𞤲𞤭 𞤱𞤮𞤲𞤵𞤺𞤮𞤤 𞤪𞤫𞥅𞤲𞤮𞥅𞤱𞤮 𞤣𞤫𞤥𞤮𞤳𞤢𞤪𞤢𞥄𞤳𞤵 𞤲𞤺𞤵𞤲 𞤫 𞤤𞤢𞥄𞤼𞤢𞤺𞤮𞤤 𞤸𞤫𞥅𞤣𞤮 𞤣𞤢𞤪𞤼𞤭𞥅𞤲𞤺𞤮 𞤁𞤫𞤲𞤼𞤢𞤤 𞤀𞤥𞤫𞤪𞤭𞤳 𞤫 𞤩𞤭𞤯𞤼𞤫𞥅𞤤𞤫 𞤥𞤵𞤵𞤲 𞤳𞤢 𞤬𞤢𞤺𞥆𞤵𞤣𞤵 𞤫 𞤳𞤢 𞤸𞤵𞥅𞤱𞤮𞤲𞥋𞤣𞤭𞤪𞤫.

𞤊𞤂𞤀𞤜𞤋𞤒𞤌 𞤄𞤌𞤂𞤅𞤌𞤐𞤀𞤈𞤌⹁ 𞤩𞤭𞤯𞥆𞤮 𞤢𞤬𞤮 𞤔𞤀𞤒𞤋𞤈 𞤄𞤌𞤂𞤅𞤌𞤐𞤀𞤈𞤌⹁ 𞤸𞤮𞥅𞤪𞤫𞥅𞤶𞤮 𞤳𞤭𞤯𞥆𞤮 𞤻𞤢𞥄𞤥𞤮𞤴𞤢𞤲𞤳𞤫𞥅𞤶𞤮 𞤮𞤲⹁ 𞤬𞤫𞤰𞥆𞤭𞤼𞤭𞤲𞤮 𞤂𞤓𞥅𞤂𞤀 𞤳𞤢 𞤶𞤢𞤸𞤢𞤤 𞤢𞤪𞤢𞤲𞤢𞤤. 𞤌 𞤸𞤫𞤩𞤵𞤲𞤮 𞥔𞥗% 𞤳𞤢 𞤂𞤓𞥅𞤂𞤀 𞤸𞤫𞤩𞤭 𞥔𞥕%. 𞤖𞤀𞤒𞤋𞤈 𞤄𞤌𞤂𞤅𞤌𞤐𞤀𞤈𞤌⹁ 𞤳𞤢𞤻𞤵𞤲 𞤮𞥅 𞤦𞤢𞥄𞤦𞤭𞤪𞤢𞥄𞤱𞤮 𞤤𞤢𞥄𞤥𞤭𞤲𞤮𞥅𞤯𞤮 𞤸𞤢𞤳𞥆𞤵𞤲𞤣𞤫 𞥒𞥐𞥑𞥙 𞤫 𞥒𞥐𞥒𞥒⹁ 𞤲𞤮 𞤧𞤮𞤳𞤢𞥄 𞤦𞤢𞤯𞤼𞤢𞤲𞤫 𞤫𞤼𞤢𞤺𞤮𞤤 𞤲𞤮 𞤬𞤮𞤤𞥆𞤭𞤪𞤢 𞤤𞤢𞥄𞤥𞤵 𞤲𞤺𞤵𞤲.

𞤑𞤓𞤂𞤌𞤁𞤋𞤒𞤀 𞤟𞤉𞤒𞤐𞤄𞤌𞤃⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤃𞤫𞤳𞤧𞤭𞤳 𞤲𞤣𞤭𞤲⹁  𞤧𞤫𞤴𞤲𞤭𞥅 𞤂𞤓𞥅𞤂𞤀 𞤫 𞤲𞤣𞤫𞤪 𞤱𞤭𞤲𞤣𞤢𞤲𞤣𞤫 𞤲𞤣𞤫 𞤸𞤮 𞤱𞤫𞤲𞤺𞤭 𞤫 𞤼𞤮𞤲𞤺𞤮𞥅𞤣𞤫 𞤸𞤢𞤳𞥆𞤮 𞤳𞤢 X: ” 𞤒𞤮 𞤏𞤵𞥅𞤪𞤵 𞤣𞤫𞤥𞤮𞤳𞤢𞤪𞤢𞥄𞤳𞤵⹁ 𞤳𞤮 𞤪𞤫𞤲𞤣𞤮 𞤄𞤀𞤈𞤀𞥄𞤅𞤋𞤂 𞤲𞤺𞤮𞤲 𞤬𞤮𞥅𞤤𞤭. 𞤋𞤧𞤳𞤭𞤲⹁ 𞤸𞤮𞥅𞤪𞤫𞥅𞤶𞤮 𞤂𞤓𞥅𞤂𞤀!”.

𞤔𞤵𞥅𞤼𞤭𞤲𞤺𞤮𞤤 𞤷𞤵𞤬𞤼𞤢𞤤 𞤲𞤺𞤢𞤤
𞤑𞤮 𞤩𞤢𞤣𞤭𞥅 𞤺𞤵𞤶𞤵𞤲𞤫 𞥑𞥖𞥐 𞤧𞤵𞤬𞤼𞤮𞥅𞤩𞤫 𞤲𞤮 𞤲𞤮𞤣𞥆𞤭𞤼𞤢𞤲𞤮𞥅 𞤬𞤭𞥅 𞤧𞤵𞤩𞤢𞤺𞤮𞤤 𞤧𞤭 𞤤𞤫𞤴𞤣𞤭 𞤲𞤣𞤭𞤲 𞤤𞤵𞤼𞥆𞤢𞤴 𞤱𞤮𞤲𞤵𞤣𞤫 𞤼𞤢𞤱𞤢𞥄𞤲𞤣𞤭 𞤫 𞤣𞤢𞤪𞤼𞤮𞤪𞤫 𞤲𞤢𞤲𞤮𞤴𞤢𞤲𞤳𞤫𞥅𞤶𞤫 𞤧𞤢𞤳𞥆𞤭𞤼𞤭𞥅𞤯𞤫 𞤯𞤫𞤲 𞤫 𞤲𞤣𞤫𞤪 𞤀𞤥𞤫𞤪𞤭𞤳 𞤂𞤢𞤼𞤫𞤲𞤪𞤭 𞤥𞤢𞤤𞥆𞤢 𞤧𞤭 𞤲𞤣𞤭 𞤼𞤢𞤱𞤼𞤢𞤴 𞤣𞤭𞤤𞥆𞤢𞤲𞤣𞤫 𞤻𞤢𞥄𞤥𞤮𞤴𞤢𞤲𞤳𞤫𞥅𞤪𞤫 𞤲𞤣𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤀𞤥𞤫𞤪𞤭𞤳 𞤁𞤌𞤐𞤀𞤂𞤁 𞤚𞤀𞤈𞤌𞤃𞤆𞤓 𞤱𞤮𞤲𞤭 𞤧𞤫𞤥𞤦𞤭𞤲𞤣𞤫. 𞤐𞤣𞤫 𞤦𞤮𞤼𞤫 𞤯𞤫𞤲 𞤩𞤢𞤲𞤺𞤭𞤲𞤢𞤲𞤮𞥅⹁ 𞤼𞤵𞤤𞤫 𞤴𞤭𞤥𞤩𞤫 𞤱𞤮𞤲𞤢𞤲𞤩𞤫 𞤲𞤢𞤲𞤮 𞤩𞤫𞤲 𞤬𞤫𞤼𞥆𞤭 𞤱𞤫𞤤𞤼𞤢𞥄𞤪𞤫⹁ 𞤼𞤫𞤲𞤼𞤭𞤲𞤭𞥅 𞤳𞤢 𞤸𞤮𞥅𞤪𞤫 𞤤𞤢𞥄𞤱𞤮𞤤 𞤥𞤢𞤱𞤲𞤺𞤮𞤤 𞤆𞤢𞤱𞤮𞤤𞤭𞤧𞤼𞤢 𞤲𞤺𞤮𞤤 𞤅𞤢𞤮 𞤆𞤮𞤤𞤮 𞤫 𞤳𞤢 𞤼𞤵𞤥𞤦𞤮 𞤧𞤢𞤸𞤪𞤫 𞤈𞤭𞤴𞤮 𞤣𞤫 𞤔𞤢𞤲𞤫𞤪𞤮⹁ 𞤳𞤢 𞤺𞤭𞥅𞤼𞤫𞥅𞤤𞤭 𞤱𞤫𞤤𞤼𞤢𞥄𞤪𞤫 𞤬𞤫𞤼𞥆𞤭𞤲𞤢𞥄.

𞤃𞤢𞤦𞥆𞤭𞤲𞤮 𞤬𞤭𞥅 𞤷𞤵𞤬𞤼𞤫 𞤯𞤫𞤲 𞤩𞤢𞤲𞤺𞤭𞤲𞤭𞥅 𞤲𞤮 𞤤𞤫𞤴𞤣𞤭 𞤲𞤣𞤭𞤲 𞤬𞤫𞤷𞥆𞤮𞤪𞤭 𞤱𞤵𞤪𞤭𞤲 𞤤𞤵𞤪𞥆𞤢𞤤 𞤶𞤭𞥅𞤩𞤵𞤲𞤮 𞤻𞤢𞤤𞥆𞤢𞤤 𞤷𞤵𞤬𞤼𞤫 𞤺𞤮𞥅𞤼𞤢𞤤. 𞤚𞤭𞤨𞥆𞤵𞤣𞤫 𞤫 𞤬𞤭𞤩𞤪𞤫 𞤻𞤢𞥄𞤱𞤮𞥅𞤱𞤮 𞤙𞤢𞥄𞤱𞤭𞤪𞤣𞤫 𞤚𞤮𞥅𞤱𞤵𞤲𞥋𞤣𞤫 𞤲𞤣𞤫𞤲⹁ 𞤷𞤵𞤬𞤼𞤫 𞤯𞤫𞤲 𞤶𞤵𞥅𞤼𞤭𞤲𞤭𞤪𞤢𞥄 𞤶𞤢𞤥𞤤𞤫 𞤯𞤭𞤯𞤭⹁ 𞤩𞤢𞥄𞤱𞤮 𞤱𞤵𞤤𞥆𞤭𞤼𞤢𞤲𞤣𞤫 𞤭𞤥𞥆𞤮𞤪𞤲𞤣𞤫 𞤫 𞤳𞤭𞤨𞥆𞤮𞤤 𞤂𞤓𞥅𞤂𞤀 𞤬𞤭𞥅 𞤷𞤵𞤬𞤼𞤫.

𞤊𞤭𞥅 𞤽𞤭𞤻𞤵𞤺𞤮𞤤 “𞤸𞤵𞥅𞤲𞤱𞤣𞤫 𞤢𞤻𞤭𞤲𞤭𞥅𞤲𞤣𞤫”⹁ 𞤂𞤓𞥅𞤂𞤀⹁ 𞤸𞤮𞥅𞤪𞤫𞥅𞤶𞤮 𞤣𞤢𞤪𞤭𞤼𞤭𞥅𞤯𞤮 𞤮𞤲 𞤱𞤭𞤴𞤭 𞤱𞤮𞤲𞤣𞤫𞤥𞤢 𞤷𞤵𞤬𞤼𞤮𞥅𞤩𞤫 𞤲𞤮 “𞤸𞤢𞤯𞤢𞥄 𞤧𞤵𞤬𞤼𞤵𞤺𞤮𞤤”. 𞤉 𞤥𞤭𞥅𞤶𞤮 𞤥𞤢𞤳𞥆𞤮⹁ 𞤱𞤫𞤪𞤤𞤢𞥄𞤶𞤫 𞤧𞤮𞤪𞤼𞤢𞥄𞤥𞤢 𞤫 𞤤𞤢𞥄𞤱𞤭 𞤦𞤫𞤪𞤲𞤭𞥅𞤶𞤭 𞤱𞤢𞤲𞤮 𞤅𞤢𞤱𞤮 𞤆𞤮𞤤𞤮 (𞤬𞤵𞤯𞤲𞤢𞥄𞤲𞤺𞤫-𞤻𞤢𞥄𞤥𞤮)⹁ 𞤯𞤭 𞤶𞤢𞤱𞤪𞤮𞥅𞤶𞤮 (𞤥𞤫𞥅𞤪𞤶𞤮) 𞤻𞤢𞥄𞤥𞤮𞤴𞤢𞤲𞤳𞤫𞥅 𞤤𞤢𞥄𞤥𞤭𞥅⹁ 𞤥𞤢𞤤𞥆𞤢 𞤅𞤢𞤤𞤾𞤢𞤣𞤮𞤪 𞤣𞤫 𞤄𞤢𞤸𞤭𞤴𞤢⹁ 𞤳𞤢 𞤼𞤵𞤥𞤦𞤫𞤪𞤫 𞤲𞤣𞤫 𞤮 𞤣𞤮𞥅𞤤𞤲𞤮𞤪𞤭 𞤸𞤭𞤳𞥆𞤮𞤪𞤲𞤣𞤫 -𞤊𞤵𞤯𞤲𞤢𞥄𞤲𞤺𞤫-𞤲𞤢𞤲𞤮.

𞤉 𞤸𞤢𞤨𞥆𞤵 𞤥𞤢𞤳𞥆𞤮 𞤲𞤢𞤴𞤢𞤩𞤵 𞤲𞤺𞤵𞤲⹁ 𞤺𞤮𞤤𞥆𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤮𞤲 𞤲𞤮 𞤧𞤢𞥄𞤼𞤭𞥅 𞤳𞤢 𞤧𞤢𞤼𞥆𞤢 𞤩𞤢𞥄𞤱𞤮 𞤨𞤮𞥅𞤤𞤺𞤢𞤤 𞤥𞤢𞤱𞤲𞤺𞤢𞤤 𞤼𞤢𞤦𞤭𞤴𞤢𞤲𞤳𞤮𞥅𞤩𞤫 𞤣𞤢𞤪𞤭𞥅𞤩𞤫 𞤩𞤫𞤲 𞤳𞤢 𞤷𞤵𞤬𞤼𞤫 𞤧𞤢𞤪𞤯𞤭𞤴𞤢𞤲𞤳𞤮𞥅𞤶𞤫 𞤱𞤢𞤯𞤭𞥅 𞤶𞤮𞤲𞤼𞤫 𞤼𞤢𞤼𞤭.

𞤖𞤢𞤨𞥆𞤵 𞤲𞤢𞤴𞤢𞤩𞤵 𞤱𞤮𞤲𞤣𞤢𞤲𞤣𞤫 𞤂𞤵𞥅𞤤𞤢
𞤑𞤢 𞤦𞤢𞤲𞤽𞤫 𞤲𞤫𞤯𞥆𞤢𞤲𞤳𞤫𞥅𞤴𞤢𞥄𞤺𞤢𞤤⹁ 𞤤𞤢𞥄𞤥𞤭𞤼𞤢𞤺𞤮𞤤 𞤂𞤵𞥅𞤤𞤢 𞤳𞤮 𞤼𞤭𞤥𞥆𞤮𞥅𞤣𞤫 𞤤𞤢𞥄𞤱𞤮𞤤 𞤸𞤢𞥄𞤱𞤲𞤭𞥅𞤲𞤺𞤮𞤤⹁ 𞤫 𞤣𞤢𞤪𞤼𞤢𞤺𞤮𞤤 𞤳𞤮 𞤼𞤭𞤶𞥆𞤢𞤲𞤢𞥄 𞤱𞤮𞤲𞤢𞤲𞤣𞤫 𞤷𞤵𞤳𞤢𞤤𞤫𞤤 𞤼𞤢𞤥𞤨𞤵𞤲’𞤺𞤫𞤤 𞤶𞤫𞤴𞤢𞥄𞤲𞤺𞤫𞤤 𞤆𞤫𞤪𞤲𞤢𞤥𞤦𞤵𞤳 (𞤬𞤵𞤯𞤲𞤢𞥄𞤲𞤺𞤫-𞤲𞤢𞤲𞤮). 𞤌𞤥𞤮 𞤶𞤮𞤺𞤭𞥅 𞤩𞤵𞤪𞤼𞤢𞤤: 𞤯𞤵𞤥 𞤳𞤮 𞤱𞤮𞤲𞤵𞤺𞤮𞤤 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤤𞤢𞥄𞤥𞥆𞤭𞤲𞤭𞤪𞤢𞥄𞤯𞤮 𞤣𞤫𞤥𞤮𞤳𞤢𞤪𞤢𞥄𞤳𞤵 𞤸𞤢𞤴 𞤺𞤮𞥅𞤼𞤮 𞤤𞤢𞥄𞤥𞤢𞥄𞤳𞤭 𞤄𞤀𞤈𞤀𞥄𞤅𞤋𞤂 𞤲𞤮 𞤶𞤵𞥅𞤼𞤭𞤪𞤭 𞤱𞤢 𞤥𞤢𞤳𞥆𞤮.

𞤑𞤢𞤲𞤳𞤮⹁ 𞤮𞥅 𞤱𞤮𞤲𞤵𞤯𞤮 𞤺𞤮𞥅𞤼𞤮 𞤫 𞤢𞤪𞤣𞤭𞥅𞤩𞤫 𞤩𞤵𞤪𞤵𞤩𞤫 𞤲𞤢𞤴𞤱𞤵𞤣𞤫 𞤳𞤢 𞤱𞤭𞤲𞤣𞤫𞤪𞤫⹁ 𞤸𞤫𞤩𞤢𞤴 𞤣𞤵𞥅𞤩𞤭 𞥘𞥕 𞤳𞤢 𞤼𞤭𞤥𞥆𞤮𞥅𞤣𞤫 𞤸𞤢𞤨𞥆𞤵 𞤥𞤢𞤳𞥆𞤮 𞤸𞤫𞤧𞤵 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥓𞥐. 𞤌𞤲𞤼𞤵𞤥𞤢 𞤸𞤢𞤪𞤢𞤴 𞤮 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥑𞥖 𞤫 𞤤𞤢𞥄𞤥𞤵⹁ 𞤩𞤢𞥄𞤱𞤮 𞤮 𞤤𞤢𞥄𞤥𞤢𞥄𞤣𞤫 𞤢𞤪𞤢𞤲𞤵𞤲 𞤭𞤱𞤣𞤫 𞥒𞥐𞥐𞥓 𞤸𞤢𞥄 𞥒𞥐𞥑𞥐.

𞤇𞤮𞥅𞤴𞤥𞤢𞥄𞤶𞤮 𞤻𞤭𞥅𞤩𞤵𞤯𞤮 𞤬𞤫𞤱𞤲𞤣𞤮 𞤳𞤢 𞤤𞤢𞥄𞤥𞤩𞤫 𞤱𞤮𞤲𞤳 𞤪𞤭𞥅𞤱𞤢𞤫𞥅𞤣𞤫⹁ 𞤂𞤓𞥅𞤂𞤀 𞤣𞤢𞤪𞤼𞤭𞤳𞤫 𞤲𞤢𞤴𞤫𞤱𞤵 𞤫 𞤸𞤢𞥄𞤩𞤫𞥅𞤣𞤫 𞤥𞤢𞤱𞤲𞤣𞤫 𞤬𞤫𞤱𞤼𞤵𞤲𞥋𞤣𞤫 𞤊𞤫𞤣𞥆𞤫 𞤘𞤮𞤤𞥆𞤮𞥅𞤩𞤫 𞤲𞤣𞤫 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫 𞤸𞤵𞤥𞤭𞤲𞤣𞥋𞤭𞤪𞤼𞤢 𞤫 𞤦𞤮𞤲𞥆𞤫𞤪𞤫𞥅𞤶𞤭 𞤦𞤮𞤲𞥆𞤵𞤯𞤭 𞤭𞤲𞤣𞤫 𞤥𞤢𞤴𞤪𞤫 𞤫 𞤳𞤭𞤼𞤢𞥄𞤤𞤫 𞥒𞥐𞥐𞥐 𞤯𞤫𞤲. 𞤑𞤢𞤲𞤳𞤮 𞤼𞤭𞤺𞤭 𞤢𞤪𞤣𞤭𞥅𞤯𞤮 𞤮𞤲 𞤲𞤣𞤫⹁ 𞤴𞤭𞤴𞤭𞥅 𞤼𞤮𞥅𞤻𞤫 𞤻𞤢𞥄𞤱𞤫𞥅𞤣𞤫 𞤧𞤮𞤳𞤫𞥅 𞤦𞤢𞥄𞤤𞤯𞤫 𞥕𞥘𞥐 𞤬𞤭𞥅 𞤺𞤵𞤴𞤢𞥄𞤤𞤫 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥘 𞤸𞤢𞥄 𞥒𞥐𞥑𞥙⹁ 𞤢𞤣𞤮 𞤲𞤣𞤫𞥅𞤲 𞤶𞤵𞤳𞥆𞤫𞤪𞤫 𞤦𞤮𞤪𞤼𞤭𞤪𞤫𞥅𞤣𞤫 𞤧𞤢𞤦𞤵 𞤮𞥅𞤻𞤢𞤺𞤮𞤤 𞤤𞤢𞥄𞤱𞤭 𞤪𞤫𞤱𞤪𞤢𞥄𞤯𞤭 𞤯𞤭𞤲.

𞤊𞤭𞥅 𞤱𞤢𞤴𞤤𞤭𞤼𞤵𞤺𞤮𞤤 𞤦𞤮𞤼𞤫 𞤶𞤢𞤸𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤⹁ 𞤳𞤢𞤲𞤳𞤮 𞤲𞤣𞤫𞥅 𞤸𞤮𞥅𞤣𞤫𞤪𞤫 𞤱𞤭𞤲𞤣𞤫𞤪𞤫𞥅𞤪𞤫 𞤱𞤮𞤲𞤢𞤲𞤣𞤫 𞤲𞤢𞤲𞤮 𞤲𞤺𞤮𞤲 𞤩𞤫𞤴𞤣𞤭 𞤯𞤵𞥅𞤯𞥆𞤭𞤲𞤣𞤫 𞤳𞤢 𞤧𞤢𞤳𞥆𞤭𞤼𞤮𞤪𞤵𞤲 𞤨𞤫𞤸𞤫 𞤥𞤵𞤴𞤦𞤭𞤲𞤯𞤫 𞤳𞤮𞤲𞤮 𞤼𞤭𞥅𞤯𞤵𞤯𞤫 𞤷𞤮𞤺𞥆𞤮. 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤄𞤀𞤈𞤀𞥄𞤅𞤋𞤂 𞤢𞤪𞤢𞤲𞤮 𞤫 𞤴𞤢𞤤𞤼𞤵𞤺𞤮𞤤 𞤫 𞤲𞤣𞤫𞤪 𞤸𞤭𞤲𞤣𞤫 𞤺𞤮𞤤𞥆𞤮𞥅𞤩𞤫 𞤩𞤫𞤲 𞤩𞤫𞤴𞤣𞤭𞥅 𞤣𞤢𞤪𞤶𞤭𞤲𞤣𞤫 𞤄𞤮𞤤𞤧𞤢 𞤊𞤢𞤥𞤭𞤤𞤭𞤴𞤢⹁ 𞤫𞤩𞥆𞤮𞥅𞤪𞤫 𞤥𞤢𞤳𞥆𞤮 𞤪𞤫𞤲𞤣𞤮𞤴𞤢𞤲𞤳𞤮𞥅𞤪𞤫 𞤥𞤢𞤱𞤲𞤣𞤫 𞤸𞤫𞤼𞥆𞤢𞤲𞤢𞥄𞤲𞤣𞤫 𞤬𞤭𞥅 𞤩𞤫𞤧𞤲𞤺𞤵𞥅𞤶𞤫 𞤩𞤵𞤪𞤵𞤯𞤫 𞤼𞤢𞤤𞤳𞤭𞤯𞤵𞤣𞤫 𞤯𞤫𞤲.