𞤄𞤀𞤂𞤌𞤐 𞤁𞤌𞥅𞤈 (Ballon d’Or) 𞤳𞤮 𞤳𞤮𞤲𞤺𞤮𞤤 𞤊𞤢𞤪𞤢𞤲𞤧𞤭𞥅𞤪𞤫 𞤬𞤭𞤪𞤵𞤲’𞤺𞤮𞤤 “𞤃𞤓𞤂𞥆𞤉𞤈𞤉 𞤑𞤀𞤐𞤛𞤉” 𞤫 𞤆𞤵𞤤𞤢𞤪.
𞤑𞤮 𞤲𞤦𞤢𞤪𞤶𞤢𞥄𞤪𞤭 𞤥𞤢𞤱𞤲𞤣𞤭 𞤸𞤭𞤼𞤢𞥄𞤲𞤣𞤫𞥅𞤪𞤭⹁ 𞤲𞤣𞤭 𞤖𞤫𞤧𞤤𞤢𞤤 𞤊𞤀𞤈𞤀𞤐𞤅𞤋 𞤊𞤓𞤚𞤄𞤌𞤂 (France Football) 𞤧𞤭𞤲𞤷𞤭 𞤺𞤭𞤦𞤭 𞥑𞥙𞥕𞥖.
𞤊𞤢𞥄𞤲𞤣𞤢𞥄𞤪𞤫 𞤧𞤭𞤲𞤷𞤵𞤩𞤫 𞤲𞤣𞤭𞥅 𞤲𞤦𞤢𞤪𞤶𞤢𞥄𞤪𞤭⹁ 𞤳𞤮 𞤥𞤢𞤱𞤲𞤭𞤲𞤺𞤮𞤤 𞤫 𞤸𞤭𞤼𞥆𞤭𞤲𞤺𞤮𞤤 𞤬𞤭𞤶𞤮𞥅𞤱𞤮 𞤩𞤵𞤪𞤵𞤯𞤮 𞤥𞤮𞤰𞥆𞤵𞤣𞤫 𞤫 𞤣𞤵𞤲𞤷𞤵𞤣𞤫 𞤫 𞤸𞤭𞤼𞤢𞥄𞤲𞤣𞤫 𞤬𞤫𞤰𞥆𞤵𞤲’𞤣𞤫 𞤲𞤣𞤫𞤲.
𞤊𞤫𞤱𞤲𞤣𞤮 𞤲𞤣𞤭 𞤧𞤭𞤲𞤷𞤢𞥄⹁ 𞤳𞤮 𞤬𞤭𞤶𞤮𞥅𞤩𞤫 𞤉𞤪𞤮𞤨𞤲𞤢𞥄𞤩𞤫 𞤱𞤮𞤲𞤵𞤩𞤫 𞤬𞤭𞤶𞤢𞤲𞤣𞤫 𞤳𞤭𞤨𞥆𞤭 𞤉𞤪𞤮𞤨 𞤯𞤭𞤲 𞤼𞤢𞤲 𞤲𞤣𞤭 𞤸𞤫𞤩𞤼𞤢𞤼𞤢𞤲𞤮𞥅. 𞤑𞤮 𞤭𞤱𞤣𞤫 𞥑𞥙𞥙𞥕 𞤲𞤣𞤭 𞤴𞤢𞥄𞤶𞤭𞤲𞤢𞥄 𞤸𞤢𞥄 𞤫 𞤬𞤭𞤶𞤢𞤲𞤮𞥅𞤩𞤫 𞤳𞤭𞤨𞥆𞤭 𞤉𞤪𞤮𞤨 𞤯𞤭𞤲 𞤲𞤮𞤳𞥆𞤵 𞤳𞤢𞤤𞤢 𞤳𞤢 𞤩𞤫 𞤶𞤫𞤴𞤭𞤪𞤢𞥄⹁ 𞤬𞤮𞤼𞤭 𞤧𞤭 𞤳𞤮 𞤩𞤫 𞤉𞤪𞤮𞤨𞤲𞤢𞥄𞤩𞤫 𞤥𞤢𞤤𞥆𞤢 𞤳𞤮 𞤶𞤫𞤴𞤢𞥄𞤩𞤫 𞤺𞤢𞤯𞤢 𞤉𞤪𞤮𞤨. 𞤘𞤭𞤦𞤭 𞤲𞤮𞤲 𞥒𞥐𞥐𞥗⹁ 𞤲𞤣𞤭 𞤴𞤢𞥄𞤻𞥆𞤢𞥄𞤥𞤢 𞤳𞤢𞤣𞤭 𞤸𞤢𞥄 𞤫 𞤬𞤭𞤶𞤮𞥅𞤩𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲 𞤬𞤮𞤨⹁ 𞤲𞤮𞤳𞥆𞤵 𞤳𞤢𞤤𞤢 𞤳𞤢 𞤩𞤫 𞤱𞤮𞤲𞤭 𞤬𞤭𞤶𞤭𞤪𞤣𞤫 𞤫 𞤳𞤢 𞤩𞤫 𞤶𞤫𞤴𞤭𞤪𞤢𞥄.
𞤖𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥘⹁ 𞤳𞤮 𞤬𞤭𞤶𞤮𞥅𞤩𞤫 𞤱𞤮𞤪𞤩𞤫 𞤩𞤫𞤲 𞤼𞤢𞤲 𞤱𞤮𞤲𞤢𞤲𞤮𞥅 𞤱𞤢𞤪𞤶𞤫𞥅𞤣𞤫. 𞤑𞤮 𞤫 𞤲𞤣𞤫𞥅𞤲 𞤸𞤭𞤼𞤢𞥄𞤲𞤣𞤫 𞤯𞤮𞥅𞤲⹁ 𞤪𞤫𞤱𞤩𞤫 𞤩𞤫𞤲 𞤳𞤢𞤣𞤭 𞤼𞤢𞤱𞤲𞤮𞤪𞤢𞥄 𞤫 𞤱𞤢𞤪𞤶𞤫𞤼𞤫𞥅𞤩𞤫 𞤩𞤫𞤲. 𞤑𞤮𞤲𞤮 𞤱𞤮𞤪𞤩𞤫 𞤩𞤫𞤲 𞤫 𞤪𞤫𞤱𞤩𞤫 𞤩𞤫𞤲⹁ 𞤥𞤮𞤲𞤭 𞤳𞤢𞤤𞤢 𞤫 𞤥𞤢𞤩𞥆𞤫⹁ 𞤲𞤮 𞤸𞤫𞥅𞤪𞤼𞤭𞤲𞤢𞤲𞤢𞥄 𞤲𞤦𞤢𞤪𞤶𞤢𞥄𞤪𞤭 𞤥𞤵𞤵𞤲 𞤬𞤫𞥅𞤪𞤫.
𞤖𞤌𞤂 𞤐𞤌 𞤊𞤌𞥅𞤂𞤓𞤍𞤌 𞤌𞤐 𞤅𞤓𞤇𞤋𞤈𞤚𞤉𞥅؟
𞤖𞤫𞤲𞤣𞤮𞤼𞤮𞥅𞤯𞤮 𞤥𞤵𞤤𞥆𞤫𞤪𞤫 𞤳𞤢𞤲𞤽𞤫 𞤲𞤣𞤫𞤲 𞤳𞤮 𞤷𞤵𞤬𞤼𞤢𞤲𞤼𞤫𞥅𞤯𞤮. 𞤖𞤭𞤼𞤢𞥄𞤲𞤣𞤫 𞤳𞤢𞤤𞤢⹁ 𞤺𞤮𞤤𞥆𞤢𞤲𞤮𞥅𞤩𞤫 𞤊𞤢𞤪𞤢𞤲𞤧𞤭 𞤊𞤵𞤼𞤦𞤮𞤤 𞤥𞤮𞤰𞥆𞤭𞤲𞤢𞤴 𞤤𞤭𞤥𞤼𞤮𞤤 𞤬𞤭𞤶𞤮𞥅𞤩𞤫 𞤷𞤢𞤨𞥆𞤢𞤲𞤯𞤫 𞤼𞤢𞤼𞤮. 𞤂𞤭𞤥𞤼𞤮𞤤 𞤲𞤺𞤮𞤤 𞤧𞤫𞤲𞤣𞤭𞤼𞤢𞤲𞤫𞥅 𞤸𞤫𞤧𞤤𞤮𞥅𞤩𞤫 𞤧𞤵𞥅𞤼𞤢𞥄𞤩𞤫 𞤫 𞤲𞤣𞤫𞤪 𞤤𞤫𞤴𞤯𞤫 𞤼𞤫𞥅𞤥𞤫𞤣𞤫𞤪𞤫 𞤰𞤫𞤤𞥆𞤭𞤼𞤭𞥅𞤯𞤫 𞤫 𞤤𞤢𞤼𞤮 𞤲𞤺𞤮𞤲. 𞤂𞤫𞤴𞤣𞤭 𞤳𞤢𞤤𞤢 𞤫 𞤯𞤫𞥅𞤲 𞤤𞤫𞤴𞤯𞤫 𞤲𞤮 𞤸𞤢𞤨𞥆𞤢𞤲𞤢𞥄 𞤭𞤼𞥆𞤵𞤺𞤮𞤤 𞤸𞤫𞤧𞤤𞤮𞥅𞤱𞤮 𞤺𞤮𞥅𞤼𞤮 𞤳𞤮 𞤷𞤵𞤬𞤼𞤢. 𞤑𞤢 𞤪𞤫𞤱𞤩𞤫 𞤩𞤫𞤲 𞤳𞤮 𞤸𞤫𞤧𞤤𞤮𞥅𞤩𞤫 𞤷𞤢𞤨𞥆𞤢𞤲𞤯𞤫 𞤲𞤶𞤮𞤱𞤮. 𞤑𞤮 𞤩𞤫𞥅 𞤯𞤮𞥅 𞤱𞤮𞤲𞤭 𞤻𞤢𞥄𞤱𞤮𞥅𞤩𞤫 𞤩𞤫𞤲.
𞤙𞤢𞥄𞤱𞤮𞥅𞤱𞤮 𞤳𞤢𞤤𞤢 𞤧𞤵𞤩𞤮𞥅 𞤬𞤭𞤶𞤮𞥅𞤩𞤫 𞤧𞤢𞤨𞥆𞤮 𞤸𞤢𞤳𞥆𞤵𞤲𞥋𞤣𞤫 𞤩𞤫𞥅 𞤷𞤢𞤨𞥆𞤢𞤲𞤯𞤫 𞤼𞤢𞤼𞤮⹁ 𞤪𞤫𞤬𞤼𞤭 𞤮 𞤪𞤫𞤱𞤲𞤭𞤲𞥋𞤣𞤭𞤪𞤢 𞤩𞤫 𞤺𞤭𞤤𞤢 𞤢𞤪𞤢𞤲𞤮 𞤮𞤲 𞤸𞤢𞥄 𞤧𞤢𞤨𞥆𞤢𞤩𞤮 𞤮𞤲. 𞤖𞤮𞥅𞤼𞤭⹁ 𞤮 𞤱𞤢𞤯𞤢𞤲𞤢 𞤬𞤭𞤶𞤮𞥅𞤱𞤮 𞤳𞤢𞤤𞤢 𞤼𞤮𞤩𞥆𞤫. 𞤘𞤭𞤤𞤢 𞤼𞤮𞤩𞥆𞤫 𞥑𞥕 𞤱𞤮𞤲𞤢𞤲𞤣𞤫 𞤢𞤪𞤢𞤲𞤮 𞤮𞤲 𞤸𞤢𞥄 𞤼𞤮𞤩𞥆𞤫𞤪𞤫 𞤱𞤮𞥅𞤼𞤫𞤪𞤫 𞤱𞤮𞤲𞤢𞤲𞤣𞤫 𞤧𞤢𞤨𞥆𞤢𞤩𞤮 𞤮𞤲. 𞤑𞤮 𞤬𞤭𞤶𞤮𞥅𞤱𞤮 𞤩𞤵𞤪𞤵𞤯𞤮 𞤱𞤮𞥅 𞤼𞤮𞤩𞥆𞤫 𞤸𞤫𞤩𞤲𞤣𞤭𞤲𞤼𞤫𞥅 𞤥𞤵𞤤𞥆𞤫𞤪𞤫 𞤳𞤢𞤲𞤽𞤫 𞤲𞤣𞤫𞤲. 𞤅𞤭 𞤴𞤮𞤺𞤢 𞤫 𞤬𞤭𞤶𞤮𞥅𞤩𞤫 𞤩𞤫𞤲 𞤬𞤮𞤼𞤭𞥅 𞤼𞤮𞤩𞥆𞤫⹁ 𞤳𞤮 𞤩𞤵𞤪𞤵𞤯𞤮 𞤱𞤮𞥅 𞤸𞤫𞤩𞤵𞤣𞤫 𞤣𞤢𞤪𞤲𞤣𞤫 𞤢𞤪𞤢𞤲𞤫𞤪𞤫 𞤲𞤣𞤫𞤲 𞤬𞤮𞥅𞤤𞤢𞤼𞤢.
𞤘𞤭𞤤𞤢 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫 𞤲𞤣𞤫𞤲 𞤬𞤵𞤯𞥆𞤢𞥄 𞤴𞤫𞤯𞤫𞥅𞤣𞤫⹁ 𞤳𞤮 𞤂𞤋𞤒𞤌𞤐𞤉𞤂 𞤃𞤉𞤅𞤋𞥅⹁ 𞤬𞤭𞤶𞤢𞤲𞤮𞥅𞤱𞤮 𞤤𞤫𞤴𞤣𞤭 𞤀𞤪𞤶𞤢𞤲𞤼𞤭𞤲𞤢 𞤲𞤣𞤭𞤲 𞤩𞤵𞤪𞤭 𞤸𞤫𞤲𞤣𞤢𞥄𞤲𞤣𞤫 𞤲𞤣𞤭𞥅 𞤲𞤦𞤢𞤪𞤶𞤢𞥄𞤪𞤭. 𞤑𞤢𞤲𞤳𞤮 𞤼𞤢𞤲⹁ 𞤮 𞤸𞤫𞤲𞤣𞤭𞤳𞤫 𞤃𞤵𞤤𞥆𞤫 𞤑𞤢𞤲𞤽𞤫 𞤶𞤫𞥅𞤼𞤢𞤼𞤭. 𞤐𞤮 𞤸𞤭𞤳𞥆𞤭𞥅 𞤥𞤮⹁ 𞤑𞤋𞤈𞤋𞤅𞤚𞤋𞤒𞤀𞤐𞤌𞥅 𞤈𞤌𞤐𞤀𞤂𞤁𞤌𞥅 𞤥𞤮 𞤤𞤫𞤴𞤣𞤭 𞤆𞤮𞤪𞤼𞤭𞤺𞤢𞤤 𞤲𞤣𞤭𞤲. 𞤑𞤢𞤲𞤳𞤮⹁ 𞤮 𞤸𞤫𞤩𞤭𞥅 𞤯𞤫 𞤶𞤮𞤱𞤭. 𞤏𞤵𞤪𞤭𞤲 𞤺𞤭𞤤𞤢 𞥒𞥐𞥐𞥘 𞤸𞤢𞥄 𞥒𞥐𞥑𞥗⹁ 𞤳𞤮 𞤩𞤫𞥅 𞤯𞤭𞤯𞤮 𞤱𞤮𞤲𞤵𞤲𞤮𞥅 𞤤𞤮𞤲𞤼𞤮𞤲𞥋𞤣𞤭𞤪𞤲𞤣𞤫 𞤫 𞤸𞤫𞤩𞤵𞤺𞤮𞤤 𞤲𞤣𞤫𞥅 𞤥𞤵𞤤𞥆𞤫𞤪𞤫.
𞤒𞤀𞤂𞥆𞤋 𞤀𞤊𞤈𞤋𞤑 𞤖𞤉𞤇𞤋𞥅 𞤒𞤉𞤍𞤀𞥄𞤇𞤉 𞤐𞤁𞤋𞥅 𞤐𞤄𞤀𞤈𞤔𞤀𞥄𞤈𞤋؟
𞤋𞤦𞤢 𞤲𞤣𞤭𞥅 𞤲𞤦𞤢𞤪𞤶𞤢𞥄𞤪𞤭 𞤬𞤵𞤯𞥆𞤢𞥄⹁ 𞤳𞤮 𞤢𞤬𞤪𞤭𞤳𞤲𞤢𞥄𞤶𞤮 𞤺𞤮𞥅𞤼𞤮 𞤨𞤫𞤼 𞤸𞤫𞤩𞤲𞤣𞤭𞤲𞤢𞥄 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫 𞤲𞤣𞤫𞤲. 𞤌𞥅𞤲 𞤳𞤮 𞤔𞤌𞤈𞤔𞤓 𞤏𞤉𞤒𞤀𞥄 𞤥𞤮 𞤤𞤫𞤧𞤣𞤭 𞤂𞤢𞤦𞤭𞤪𞤭𞤴𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥕. 𞤑𞤮 𞤫 𞤲𞤣𞤫𞥅𞤲 𞤸𞤭𞤼𞤢𞥄𞤲𞤣𞤫 𞤳𞤢𞤣𞤭⹁ 𞤧𞤢𞤪𞤼𞤭𞥅𞤶𞤭 𞤼𞤢𞤱𞤫𞤺𞤮𞤤 𞤫 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞤱𞤢𞤴𞤤𞤢𞥄⹁ 𞤬𞤭𞤶𞤮𞥅𞤩𞤫 𞤩𞤫 𞤱𞤮𞤲𞤢𞥄 𞤩𞤭𞥅-𞤤𞤫𞤴𞤣𞤭𞥅𞤩𞤫 𞤉𞤪𞤮𞤨 𞤩𞤫𞤲 𞤣𞤵𞤽𞤢𞤲𞤢𞥄 𞤼𞤢𞤱𞤲𞤮𞤪𞤫𞥅𞤣𞤫.
𞤑𞤢 𞤣𞤫𞤲𞤣𞤢𞥄𞤲𞤺𞤢𞤤⹁ 𞤳𞤮 𞤩𞤢𞤤𞤫𞥅𞤩𞤫 𞤶𞤫𞥅𞤺𞤮𞤮 𞤰𞤫𞤼𞥆𞤭 𞤑𞤢𞤲𞤽𞤫𞥅𞤪𞤫 𞤲𞤣𞤫𞤲. 𞤐𞤮 𞤼𞤢𞤱𞤢𞥄 𞤫 𞤥𞤢𞤩𞥆𞤫⹁ 𞤈𞤌𞤐𞤀𞤂𞤁𞤌𞥅 𞤫 𞤈𞤌𞤐𞤀𞤂𞤁𞤋𞤙𞤌⹁ 𞤩𞤫 𞤤𞤫𞤴𞤣𞤭 𞤄𞤢𞤪𞤢𞥄𞤧𞤭𞤤. 𞤐𞤮 𞤼𞤢𞤱𞤢𞥄 𞤸𞤫𞤲 𞤳𞤢𞤣𞤭, 𞤓𞤅𞤃𞤀𞥄𞤐𞤋 𞤁𞤉𞤃𞤄𞤉𞤂𞤉⹁ 𞤆𞤵𞤤𞥆𞤮 𞤬𞤭𞤶𞤢𞤲𞤮𞥅𞤱𞤮 𞤤𞤫𞤴𞤣𞤭 𞤊𞤢𞤪𞤢𞤲𞤧𞤭⹁ 𞤳𞤮𞤲𞤮 𞤥𞤮 𞤭𞤱𞤣𞤭 𞤥𞤵𞤵𞤲 𞤱𞤮𞤲𞤭 𞤊𞤓𞥅𞤚𞤀 𞤚𞤌𞥅𞤈𞤌 𞤫 𞤣𞤭𞥅𞤱𞤢𞤤 𞤭𞤲𞥆𞤫𞤼𞤫𞥅𞤲𞤺𞤢𞤤 𞤘𞤌𞤈𞤘𞤌𞤂 𞤫 𞤲𞤣𞤫𞤪 𞤤𞤫𞤴𞤣𞤭 𞤃𞤮𞤪𞤭𞤼𞤢𞤲𞤭.
𞤐𞤄𞤉𞤂𞤉 𞤐𞤁𞤉𞥅 𞤃𞤓𞤂𞥆𞤉𞤈𞤉 𞤑𞤀𞤐𞤛𞤉 𞤐𞤌 𞤖𞤋𞤚𞥆𞤋؟
𞤊𞤫𞤱𞤲𞤣𞤮 𞤸𞤢𞤲𞤣𞤫⹁ 𞤢𞤤𞤢𞥄 𞤲𞤦𞤢𞤪𞤶𞤢𞥄𞤪𞤭 𞤴𞤫𞤯𞤫𞤼𞤫𞥅𞤲𞤣𞤭 𞤬𞤭𞤶𞤮𞥅𞤱𞤮 𞤸𞤭𞤼𞥆𞤭𞤪𞤲𞤣𞤭 𞤱𞤢𞤲𞤮 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫 𞤲𞤣𞤫𞤲. 𞤑𞤮 𞤴𞤫𞤤𞤢 𞤳𞤢𞤤𞤢 𞤤𞤢𞤼𞤮𞥅𞤱𞤮, 𞤴𞤫𞤯𞤫𞥅𞤣𞤫 𞤲𞤣𞤫. 𞤐𞤁𞤫 𞤩𞤫𞤴𞤣𞤢𞤲𞤢𞤴 𞤳𞤢𞤤𞤢 𞤸𞤫𞤩𞤵𞤯𞤮 𞤲𞤣𞤫⹁ 𞤣𞤢𞤪𞤶𞤢 𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲. 𞤐𞤁𞤫 𞤩𞤫𞤴𞤣𞤢𞤲𞤢𞤴𞤢 𞤸𞤢𞤴 𞤳𞤭𞤨𞥆𞤮𞤤 𞤮𞤲𞤼𞤭𞤺𞤭 𞤲𞤺𞤮𞤤⹁ 𞤲𞤢𞤲𞤼𞤵𞤺𞤮𞤤 𞤭𞤲𞤣𞤫. 𞤈𞤫𞤬𞤼𞤭 𞤷𞤮𞤺𞥆𞤵 𞤺𞤮𞤤𞥆𞤫 𞤥𞤢𞤳𞥆𞤮 𞤯𞤫𞤲 𞤩𞤫𞤴𞤣𞤮𞥅 𞤬𞤮𞤼𞤢.
𞤑𞤮𞤲𞤮 𞤧𞤵𞤩𞤢𞤺𞤮𞤤 𞤬𞤭𞤶𞤮𞥅𞤱𞤮 𞤩𞤵𞤪𞤵𞤯𞤮 𞤣𞤵𞤲𞤷𞤵𞤣𞤫 𞤫 𞤱𞤢𞥄𞤱𞤵𞤣𞤫⹁ 𞤱𞤮𞤲𞤢𞥄 𞤸𞤵𞥅𞤲𞤣𞤫 𞤲𞤫𞤱𞤭𞥅𞤲𞤣𞤫. 𞤏𞤫𞤲𞤶𞤫 𞤧𞤢𞤯𞤢𞥄 𞤫 𞤥𞤵𞤪𞤢𞥄𞤣𞤵 𞤲𞤣𞤵𞤲. 𞤄𞤢𞤯𞤼𞤢𞤲𞤫 𞤷𞤵𞤬𞤼𞤢𞤤 𞤳𞤢𞤤𞤢⹁ 𞤱𞤮𞥅𞤣𞤢𞤴 𞤭𞤼𞥆𞤵𞤩𞤫 𞤫𞤤𞥆𞤢 𞤫 𞤧𞤵𞤩𞤢𞥄𞤯𞤮 𞤮𞤲. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤳𞤮 𞤬𞤭𞤶𞤮𞥅𞤩𞤫 𞤴𞤫𞥅𞤧𞤮 𞤩𞤫𞤲⹁ 𞤼𞤫𞥅𞤽𞤼𞤭𞤲𞤭𞥅 𞤲𞤢𞥄𞤣𞤮𞥅𞤩𞤫 𞤳𞤵𞥅𞤤𞤫 𞤩𞤫𞤲⹁ 𞤩𞤵𞤪𞤭 𞤸𞤫𞤩𞤵𞤣𞤫 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫 𞤲𞤣𞤫𞤲.
𞤉 𞤥𞤭𞤧𞤢𞤤⹁ 𞤺𞤭𞤤𞤢 𞤊𞤢𞤪𞤢𞤲𞤧𞤭 𞤊𞤵𞤼𞤦𞤮𞤤 𞤬𞤵𞤯𞥆𞤭𞥅 𞤶𞤮𞤺𞤲𞤵𞤣𞤫 𞤲𞤣𞤫𞥅 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫⹁ 𞤳𞤮 𞤪𞤫𞥅𞤲𞤮𞥅𞤱𞤮 𞤸𞤵𞥅𞤤𞤭𞤪𞤣𞤫 𞤺𞤮𞥅𞤼𞤮 𞤼𞤢𞤲 𞤸𞤫𞤩𞤲𞤣𞤭𞥅 𞤲𞤣𞤫. 𞤂𞤉𞥅𞤏 𞤋𞤏𞤀𞤐𞤌𞤏𞤋𞤕 𞤒𞤀𞥄𞤡𞤋𞤐⹁ 𞤥𞤮 𞤤𞤫𞤴𞤣𞤭 𞤆𞤮𞤼𞥆𞤢𞤤 𞤖𞤢𞤱𞤼𞤢𞥄𞤯𞤫 𞤅𞤮𞤱𞤭𞤴𞤫𞤼 𞤢𞤲𞤣𞤭𞤪𞤢𞥄𞤲𞤣𞤭 𞤈𞤮𞥅𞤧𞤭𞤴𞤢 𞤸𞤢𞤲𞤣𞤫⹁ 𞤱𞤮𞤲𞤭 𞤦𞤢𞤶𞥆𞤮 𞤫 𞤢𞤴𞤲𞤮𞥅𞤩𞤫 𞤸𞤵𞥅𞤤𞤭𞤪𞤣𞤫 𞤸𞤫𞤩𞤲𞤣𞤭𞤲𞤢𞥄𞤯𞤮 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫 𞤲𞤣𞤫𞤲 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥗.
𞤎𞤉𞤚𞥆𞤓𞤇𞤉 𞤃𞤓𞤂𞥆𞤉𞤈𞤉 𞤑𞤀𞤐𞤛𞤉 𞤐𞤁𞤉𞤐 𞤖𞤋𞤑𞥆𞤀 𞤉 𞥒𞥐𞥒𞥖
𞤖𞤭𞤳𞥆𞤢 𞤯𞤮𞤮 𞤫 𞥒𞥐𞥒𞥖⹁ 𞤳𞤮 𞤖𞤀𞤈𞥆𞤋𞥅 𞤑𞤉𞤒𞤐⹁ 𞤫𞤲𞤺𞤫𞤤𞤫𞥅𞤶𞤮 𞤬𞤭𞤶𞤢𞤲𞤮𞥅𞤱𞤮 𞤳𞤭𞤨𞥆𞤵 𞤄𞤢𞤴𞤫𞤪𞤲 𞤫 𞤀𞤂𞤉𞤑𞤅𞤋𞤒𞤀 𞤆𞤓𞤚𞤉𞤂𞤀𞤧 𞤣𞤫𞤦𞥆𞤮 𞤬𞤭𞤶𞤢𞤲𞤮𞥅𞤱𞤮 𞤄𞤢𞤪𞤧𞤫𞤤𞤮𞥅𞤲⹁ 𞤸𞤫𞤩𞤲𞤣𞤭𞤲𞤢𞥄 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫 𞤲𞤣𞤫𞤲 𞤳𞤢 𞤱𞤮𞤪𞤩𞤫 𞤫 𞤳𞤢 𞤪𞤫𞤱𞤩𞤫.
𞤑𞤮 𞤖𞤀𞤈𞥆𞤋𞥅 𞤑𞤉𞤒𞤐 𞤱𞤮𞤲𞤭 𞤉𞤲𞤺𞤫𞤤𞤫𞥅𞤶𞤮 𞤰𞤫𞤼𞥆𞤵𞤯𞤮 𞤃𞤵𞤤𞥆𞤫𞤪𞤫 𞤫 𞤲𞤣𞤫𞤪 𞤯𞤭𞥅 𞤣𞤵𞥅𞤩𞤭 𞥒𞥕 𞤧𞤢𞤳𞥆𞤭𞤼𞤭𞥅𞤯𞤭. 𞤌 𞤬𞤮𞥅𞤤𞤭 𞤑𞤋𞤂𞤋𞤒𞤀𞤐 𞤐𞤄𞤀𞤆𞥆𞤉 𞤥𞤮 𞤊𞤢𞤪𞤢𞤲𞤧𞤭 𞤳𞤢𞤻𞤵𞤲 𞤫 𞤂𞤀𞤃𞤋𞥅𞤐 𞤒𞤀𞤃𞤀𞤂 𞤥𞤮 𞤉𞤧𞤨𞤢𞥄𞤻.
𞤏𞤮𞤲𞤭𞥅 𞤤𞤢𞥄𞤦𞤭 𞤼𞤢𞤼𞤭⹁ 𞤀𞤂𞤉𞤑𞤅𞤋𞤒𞤀 𞤆𞤓𞤚𞤉𞤂𞤀𞤅⹁ 𞤲𞤮 𞤸𞤫𞤲𞤣𞤢𞥄𞤣𞤫 𞤥𞤵𞤤𞥆𞤫𞤪𞤫 𞤳𞤢𞤲𞤽𞤫 𞤲𞤣𞤫𞤲 𞤳𞤢 𞤪𞤫𞤱𞤩𞤫. 𞤑𞤮 𞤳𞤢𞤲𞤳𞤮 𞤰𞤫𞤼𞥆𞤵𞤲𞤮𞥅 𞤲𞤣𞤫 𞤫 𞥒𞥐𞥒𞥑 𞤳𞤢𞤻𞤵𞤲 𞤫 𞥒𞥐𞥒𞥒. 𞤖𞤮 𞤸𞤫𞤱𞤼𞤭𞤼𞤭𞤳𞤫 𞤀𞤒𞤚𞤀𞤐𞤀𞥄 𞤐𞤌𞤃𞥆𞤀𞤚𞤋𞥅 𞤫𞤧𞤨𞤢𞤻𞤢𞥄𞤶𞤮 𞤬𞤭𞤶𞤭𞤣𞤭𞥅𞤯𞤮 𞤥𞤢𞤳𞥆𞤮 𞤳𞤢 𞤳𞤭𞤨𞥆𞤵 𞤄𞤢𞤪𞤧𞤫𞤤𞤮𞥅𞤲. 𞤑𞤮 𞤸𞤮𞥅 𞤰𞤫𞤼𞥆𞤭 𞤃𞤵𞤤𞥆𞤫𞤪𞤫 𞤑𞤢𞤲𞤽𞤫 𞤲𞤣𞤫𞤲 𞤳𞤢 𞤪𞤫𞤱𞤩𞤫 𞤫 𞤯𞤭𞥅 𞤣𞤵𞥅𞤩𞤭 𞤼𞤢𞤼𞤭 𞤬𞤫𞤰𞥆𞤵𞤯𞤭 𞤶𞤮𞤳𞥆𞤮𞤲𞥋𞤣𞤭𞤪𞤯𞤭.
𞤒𞤮 𞤱𞤮 𞤔𞤮𞤺𞤮𞤪𞤮 𞤔𞤢𞤥 𞤫 𞤅𞤫𞤴𞤮