𞤑𞤮 𞤬𞤢𞤥𞤯𞤭 𞤱𞤮𞥅⹁ 𞤴𞤭𞤥𞤩𞤫 𞥒𞥕 𞤲𞤮 𞤱𞤢𞤪𞤢𞥄⹁ 𞥒𞥒 𞤲𞤮 𞤦𞤢𞤪𞤥𞤭𞤲𞤢𞥄 𞤫 𞤃𞤱𞤲𞤣𞤫 𞤬𞤫𞤰𞥆𞤵𞤲’𞤣𞤫⹁ 𞤻𞤢𞤤𞤲𞤣𞤫 𞥓𞥐 𞤒𞤢𞤪𞤳𞤮 𞥒𞥐𞥒𞥖 𞤦𞤢𞤯𞤼𞤢𞤲𞤫 𞤸𞤢𞤩𞤪𞤫 𞤸𞤢𞤳𞥆𞤵𞤲’𞤣𞤫 𞤤𞤫𞤻𞤭 𞤯𞤭𞤯𞤭 𞤳𞤢 𞤸𞤭𞥅𞤪𞤲𞤢𞥄𞤲𞤺𞤫-𞤻𞤢𞥄𞤥𞤮 𞤕𞤢𞥄𞤣.
𞤒𞤫𞤪𞤵 𞤯𞤫𞥅 𞤥𞤢𞤧𞤭𞥅𞤦𞤫 𞤲𞤮 𞤸𞤫𞥅𞤱𞤭 𞤱𞤢𞤯𞤵𞤣𞤫 𞤫 𞤴𞤮𞤺𞤢 𞤫 𞤲𞤮𞤳𞥆𞤵𞥅𞤶𞤫 𞤯𞤫𞤲 𞤳𞤢 𞤣𞤮𞤱𞤪𞤭 𞤕𞤢𞥄𞤣.
𞤑𞤮 𞤥𞤫𞤥𞥆𞤭𞤲𞤭 𞤲𞤣𞤫𞥅 𞤸𞤢𞤩𞤪𞤫⹁ 𞤳𞤮 𞤲𞤣𞤫 𞤢𞤴𞤲𞤮𞥅𞤱𞤮 𞤶𞤫𞤴𞤢𞥄𞤯𞤮 𞤫 𞤤𞤫𞤻𞤮𞤤 𞤑𞤫𞤪𞤫𞤣𞤢 𞤢𞤪𞤭 𞤴𞤢𞤪𞤲𞤭𞤲𞤺𞤮𞤤 𞤲𞤢𞤴𞤭 𞤥𞤵𞤵𞤲 𞤫 𞤱𞤫𞥅𞤲𞤣𞤵 𞤱𞤮𞤲𞤵𞤲’𞤣𞤵 𞤫 𞤲𞤣𞤫𞤪 𞤲𞤮𞤳𞥆𞤵𞥅𞤪𞤫 𞤑𞤵𞤤𞤢 𞤲𞤣𞤫𞤲. 𞤍𞤵𞤥 𞤢𞤣𞥆𞤭 𞤸𞤢𞤪𞤫 𞤸𞤢𞤳𞥆𞤵𞤲𞤣𞤫 𞤢𞤴𞤲𞤮𞥅𞤱𞤮 𞤮𞤲 𞤫 𞤪𞤫𞤥𞤮𞥅𞤱𞤮 𞤲𞤣𞤫𞥅 𞤲𞤮𞤳𞥆𞤵𞥅𞤪𞤫⹁ 𞤶𞤫𞤴𞤢𞥄𞤯𞤮 𞤫 𞤤𞤫𞤻𞤮𞤤 𞤑𞤵𞤳𞤢 𞤲𞤺𞤮𞤤.
𞤖𞤢𞤪𞤫 𞤲𞤣𞤫𞤲 𞤩𞤵𞤪𞤼𞤭 𞤼𞤭𞥅𞤯𞤵𞤣𞤫 𞤲𞤣𞤫 𞤢𞤴𞤲𞤮𞥅𞤱𞤮 𞤮𞤲 𞤴𞤢𞤤𞤼𞤭𞤲𞥆𞤮𞥅 𞤶𞤮𞤺𞤢 𞤥𞤵𞤵𞤲⹁ 𞤬𞤫𞤼𞤤𞤭 𞤪𞤫𞤥𞤮𞥅𞤱𞤮 𞤮𞤲 𞤳𞤢 𞤳𞤮𞤴𞤲𞤺𞤢𞤤. 𞤍𞤵𞤥 𞤲𞤮𞤥 𞤭𞤥𞥆𞤭𞤲𞤭 𞤬𞤫𞤼𞤤𞤭𞤲’𞤣𞤭𞤪𞤮 𞤸𞤢𞤳𞥆𞤵𞤲𞤣𞤫 𞤤𞤫𞤻𞤭 𞤩𞤫𞥅 𞤯𞤭𞤯𞤮. 𞤒𞤭𞤥𞤩𞤫 𞥒𞥕 𞤱𞤢𞤪𞤢𞥄, 𞥒𞥒 𞤦𞤢𞤪𞤥𞤭𞤲𞤢𞥄. 𞤄𞤢𞤪𞤥𞤵𞤩𞤫 𞤩𞤫𞤲 𞤲𞤢𞤩𞤢𞥄𞤥𞤢 𞤳𞤢 𞤧𞤢𞤬𞤪𞤮𞤪𞤣𞤫 𞤐𞤘𞤵𞤪𞤢.
𞤂𞤢𞥄𞤥𞤵 𞤲𞤺𞤵𞤲 𞤭𞤥𞥆𞤭𞤲𞥆𞤮 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤳𞤭𞤧𞤢𞤤 𞤫 𞤲𞤮𞤳𞥆𞤵𞥅𞤪𞤫 𞤲𞤣𞤫𞤲. 𞤂𞤢𞥄𞤥𞤵 𞤲𞤺𞤵𞤲 𞤬𞤮𞤣𞤭𞥅 𞤱𞤢𞤯𞤵𞤺𞤮𞤤 𞤳𞤮𞤪𞤮𞤤 𞤸𞤵𞥅𞤩𞤵𞤲𞥋𞤺𞤮𞤤 𞤲𞤺𞤢𞤥 𞤯𞤢𞤩𞥆𞤵𞤼𞤵𞤺𞤮𞤤 𞤳𞤮 𞤱𞤮𞤲𞤭 𞤧𞤮𞤥𞤦𞤮 𞤲𞤣𞤫𞥅 𞤸𞤢𞤩𞤪𞤫⹁ 𞤪𞤫𞤬𞤼𞤭 𞤻𞤢𞥄𞤱𞤢 𞤬𞤢𞤱𞤼𞤭𞥅𞤩𞤫 𞤩𞤫𞤲 𞤲𞤺𞤮𞥅 𞤥𞤢𞤧𞤭𞥅𞤦𞤮. 𞤂𞤢𞥄𞤥𞤵 𞤲𞤺𞤵𞤲 𞤲𞤮 𞤫𞤩𞥆𞤭 𞤳𞤢𞤣𞤭 𞤧𞤫𞤥𞤦𞤭𞤲𞤺𞤮𞤤 𞤲𞤢𞤲𞤼𞤮𞤲𞥋𞤣𞤭𞤪𞤢𞤤 𞤸𞤢𞤳𞥆𞤮𞤲𞥋𞤣𞤫 𞤪𞤫𞤲𞤣𞤮𞥅𞤶𞤭 𞤯𞤭𞤲 𞤳𞤢𞤻𞤵𞤲 𞤫 𞤼𞤢𞤦𞤭𞤲𞤼𞤭𞤲𞤺𞤮𞤤 𞤩𞤵𞥅𞤩𞤼𞤵 𞤲𞤺𞤵𞤲.
𞤍𞤫𞥅 𞤺𞤫𞤪𞤫 𞤱𞤮𞤲𞤢𞥄 𞤫 𞤬𞤵𞤯𞥆𞤢𞥄𞤣𞤫 𞤱𞤮𞤲𞤭⹁ 𞤳𞤮 𞤲𞤦𞤢𞤪𞤤𞤫 𞤯𞤫𞤲 𞤩𞤫𞤴𞤣𞤭𞥅⹁ 𞤧𞤢𞤦𞤵 𞤴𞤭𞥅𞤤𞤢𞤺𞤮𞤤 𞤶𞤮𞤺𞤫 𞤸𞤢𞤩𞤭𞤪𞤯𞤫 𞤫 𞤲𞤣𞤫𞤪 𞤲𞤮𞤳𞥆𞤵𞥅𞤪𞤫 𞤅𞤢𞥄𞤸𞤢𞤤 𞤲𞤣𞤫𞤲. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤧𞤮𞥅𞤪𞤭𞥅𞤩𞤫 𞤯𞤵𞥅𞤯𞤵𞤩𞤫 𞤲𞤢𞤩𞤢𞥄𞤩𞤫 𞤳𞤢 𞤣𞤮𞤱𞤪𞤭 𞤕𞤢𞥄𞤣 𞤲𞤮 𞤵𞤳𞥆𞤭𞥅 𞤫 𞤲𞤺𞤢𞤴𞤲𞤢𞥄𞤳𞤵 𞤲𞤢𞤴𞤭. 𞤑𞤮𞤲𞤮 𞤲𞤮𞤲⹁ 𞤱𞤮𞤲𞤢𞥄 𞤳𞤢𞤥𞤩𞤫 𞤼𞤭𞤺𞤭 𞤱𞤮𞤲𞤭 𞤢𞤴𞤲𞤮𞥅𞤩𞤫 𞤩𞤫𞤲. 𞤇𞤫 𞤸𞤢𞤤𞤬𞤭𞤲𞤭 𞤲𞤢𞤴𞤭 𞤥𞤢𞤩𞥆𞤫 𞤯𞤭𞤲 𞤣𞤵𞤪𞤮𞥅𞤩𞤫 𞤶𞤮𞤺𞤭𞥅𞤩𞤫 𞤣𞤢𞤣𞤮𞤪𞤯𞤫.
𞤅𞤮 𞤨𞤫𞤸𞤫 𞤰𞤫𞤼𞥆𞤢𞥄𞤳𞤢 𞤲𞤮 𞤸𞤫𞤩𞥆𞤭𞤼𞤮𞤪𞤢 𞤲𞤣𞤵𞥅 𞤥𞤵𞤪𞤢𞥄𞤣𞤵⹁ 𞤥𞤢𞤧𞤭𞥅𞤦𞤫 𞤯𞤫𞤲 𞤩𞤫𞤴𞤣𞤮𞤼𞤮 𞤫 𞤲𞤣𞤫𞤪 𞤤𞤫𞤴𞤯𞤫 𞤀𞤬𞤪𞤭𞤳 𞤸𞤭𞤳𞥆𞤮𞤲’𞤣𞤭𞤪𞤯𞤫 𞤫 𞤅𞤢𞥄𞤸𞤢𞤤 𞤲𞤺𞤢𞤤. 𞤏𞤢𞤴𞤤𞤢𞤺𞤮𞤤 𞤴𞤢𞥄𞤧𞤭 𞤳𞤭𞤲⹁ 𞤲𞤮 𞤴𞤮𞥅𞤪𞤲𞤵𞤣𞤫 𞤳𞤵𞤯𞤭 𞤯𞤭𞤲⹁ 𞤩𞤫𞥅𞤩𞤭𞤲𞤢 𞤳𞤢𞤣𞤭 𞤩𞤵𞤤𞥆𞤭 𞤯𞤭𞤲. 𞤔𞤮𞥅𞤲𞤭 𞤸𞤢𞤴 𞤳𞤢 𞤲𞤣𞤵𞤲𞤺𞤵⹁ 𞤸𞤵𞤯𞤮 𞤫 𞤲𞤣𞤭𞤴𞤢𞤥 𞤱𞤫𞤤𞤢𞥄 𞤸𞤫𞤩𞤵𞤣𞤫. 𞤀𞤴𞤲𞤮𞥅𞤩𞤫 𞤩𞤫𞤲 𞤱𞤢𞤯𞤼𞤭𞥅 𞤶𞤭𞤨𞥆𞤢𞥄𞤣𞤫 𞤳𞤢 𞤻𞤢𞥄𞤥𞤲𞤢𞥄𞤪𞤭 𞤳𞤢𞤻𞤵𞤲 𞤫 𞤲𞤮𞤳𞥆𞤫𞥅𞤤𞤭 𞤸𞤫𞥅𞤪𞤢𞤲𞤭𞤲𞤮𞥅𞤯𞤭 𞤪𞤫𞤥𞤮𞥅𞤩𞤫 𞤩𞤫𞤲.
𞤏𞤢𞤲𞤢𞥄 𞤔𞤭𞤲𞤺𞤢𞤲𞤺𞤮𞤤 𞤥𞤮 𞤥𞤵𞤲⹁ 𞤸𞤮𞤤 𞤳𞤮 𞤁𞤫𞤥𞤮𞥅𞤱𞤮 𞤱𞤢𞤯𞤼𞤢 𞤲’𞤣𞤭𞤴𞤢𞤲 𞤱𞤢𞥄𞤤𞤭𞥅𞤯𞤢𞤲 𞤳𞤮𞤲𞤮 𞤵𞤳𞥆𞤮𞤲𞤣𞤭𞤪𞤢 𞤯𞤵𞤲 𞤫 𞤁𞤵𞤪𞤮𞥅𞤱𞤮؟