𞤔𞤭𞤪𞤺𞤭𞥅𞤶𞤫 𞤯𞤭𞤯𞤭 𞤲𞤮 𞤺𞤮𞤲𞤳𞤮𞤲𞥋𞤣𞤭𞤪𞤭 𞤉𞤧𞤨𞤢𞥄𞤻 𞤸𞤢𞤲𞤳𞤭 𞤦𞤭𞤥𞤦𞤭 𞤻𞤢𞤤𞤲𞤣𞤫 𞥒𞥘 𞤒𞤢𞤪𞤳𞤮 𞥒𞥐𞥒𞥖. 𞤑𞤮 𞤼𞤢𞤳𞥆𞤮 𞤓𞤪𞤣𞤢 (Urda) 𞤧𞤢𞤸𞤪𞤫 𞤶𞤫𞤴𞤢𞥄𞤲𞤣𞤫 𞤫 𞤣𞤭𞥅𞤱𞤢𞤤 𞤚𞤮𞤤𞤫𞤣𞤮⹁ 𞤺𞤮𞤲𞤳𞤮𞤲𞥋𞤣𞤭𞤪𞤢𞤤 𞤲𞤺𞤢𞤤 𞤱𞤢𞤯𞤭. 𞤑𞤮 𞤬𞤢𞤱𞤭 𞤴𞤭𞤥𞤩𞤫 𞥖𞥘 𞤸𞤫𞤣𞥆𞤭𞤳𞤫 𞤫 𞤯𞤫𞥅 𞤼𞤢𞤯𞤢𞥄𞤤𞤫. 𞤒𞤭𞤥𞤩𞤫 𞤯𞤵𞥅𞤯𞤵𞤩𞤫 𞤦𞤢𞤪𞤥𞤭𞥅 𞤫 𞤥𞤵𞤵𞤲 𞤳𞤢𞤣𞤭.
𞤑𞤮 𞤸𞤮𞤲𞤯𞤵𞤥 𞤱𞤢𞤯𞤭؟
𞤔𞤭𞤪𞤺𞤭𞥅𞤶𞤫 𞤯𞤫𞤲 𞤯𞤭𞤯𞤭 𞤳𞤢𞤤𞤢 𞤳𞤮 𞤃𞤀𞤁𞤈𞤋𞤁 𞤭𞤱𞤭𞤪𞤲𞤮𞥅 𞤲𞤮 𞤴𞤢𞤸𞤵𞤣𞤫 𞤅𞤉𞤜𞤋𞥅𞤒. 𞤑𞤮 𞤳𞤢𞤬𞤤𞤢𞤤 𞤭𞤲𞥆𞤫𞤼𞤫𞥅𞤲𞤺𞤢𞤤 𞤋𞤈𞤒𞤌 (Iryo) 𞤶𞤫𞤴𞤭 𞤺𞤮𞥅𞤼𞤢𞤤 𞤫 𞤤𞤢𞥄𞤯𞤫 𞤯𞤫𞤲. 𞤚𞤢𞤱𞤭 𞤲𞤮𞤲⹁ 𞤲𞤺𞤢𞥄𞤤 𞤶𞤭𞤪𞤺𞤭𞤱𞤢𞤤 𞤲𞤮 𞤣𞤢𞤪𞤭𞥅 𞤳𞤢 𞤤𞤢𞥄𞤱𞤮𞤤. 𞤔𞤭𞤪𞤺𞤭𞤱𞤢𞤤 𞤺𞤮𞥅⹁ 𞤲𞤺𞤢𞤤 𞤳𞤢𞤬𞤤𞤢𞤤 𞤱𞤭𞤴𞤫𞤼𞤫𞥅𞤲𞤺𞤢𞤤 𞤈𞤉𞤐𞤊𞤉 𞤶𞤫𞤴𞤭⹁ 𞤭𞤱𞤼𞤭𞤪𞤭 𞤩𞤢𞥄𞤱𞤮 𞤲𞤢𞥄𞤼𞤭 𞤫 𞤢𞤪𞤢𞤲𞤢𞤤 𞤲𞤺𞤢𞤤.
𞤄𞤢𞤤𞥆𞤢𞤤 𞤬𞤭𞥅 𞤦𞤢𞤪𞤥𞤵𞤩𞤫 𞤩𞤫𞤲
𞤊𞤢𞥄𞤦𞤮𞤼𞤮𞥅𞤩𞤫 𞤩𞤫𞤲 𞤲𞤮𞥅𞤼𞤭𞥅 𞤳𞤭𞤧𞤢𞤲 𞤳𞤢 𞤶𞤭𞤪𞤺𞤭𞥅𞤶𞤫 𞤯𞤫𞤲 𞤬𞤮𞤼𞥆𞤭 𞤯𞤮𞥅𞤲. 𞤇𞤫 𞤱𞤢𞤤𞥆𞤭𞤼𞤭𞥅 𞤦𞤢𞤪𞤥𞤵𞤩𞤫 𞤩𞤫𞤲. 𞤂𞤢𞥄𞤥𞤵 𞤣𞤭𞥅𞤱𞤢𞤤 𞤲𞤺𞤢𞤤 𞤱𞤭𞤴𞤭𞥅 𞤱𞤮𞤲𞤣𞤫𞤥𞤢 𞤴𞤭𞤥𞤩𞤫 𞥕𞥘 𞤲𞤮 𞤼𞤮𞤨𞥆𞤭𞤼𞤫𞥅𞤣𞤫 𞤳𞤢 𞤧𞤢𞤬𞤪𞤮𞤪𞤯𞤫.
𞤑𞤮 𞤸𞤮𞤲𞤯𞤵𞤥 𞤱𞤮𞤲𞤭 𞤧𞤮𞤥𞤦𞤮 𞤲𞤺𞤢𞥄𞤤 𞤺𞤮𞤲𞤳𞤮𞤲𞥋𞤣𞤭𞤪𞤢𞤤؟
𞤔𞤢𞥄𞤺𞤮𞤪𞤯𞤮 𞤉𞤧𞤨𞤢𞥄𞤻 𞤮𞤲 𞤬𞤭𞥅 𞤳𞤢 𞤀𞤣𞤵𞤺𞤮𞤤 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤳𞤮 𞤷𞤢𞤯𞤫𞥅𞤤𞤫 𞤬𞤮𞥅𞤺𞤭𞤪𞤺𞤢𞤤 𞤦𞤮𞤲𞥆𞤭𞤼𞤭 𞤲𞤶𞤵𞤩𞥆𞤵𞤣𞤭 𞤳𞤭𞤧𞤢𞤤 𞤶𞤭𞤪𞤺𞤭𞤱𞤢𞤤 𞤲𞤺𞤢𞤤. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤣𞤢𞤪𞤼𞤭𞤲𞤫𞥅𞤣𞤫 𞤶𞤭𞤪𞤺𞤭𞥅𞤶𞤫 𞤯𞤫𞤲 𞤫 𞤲𞤣𞤫𞤪 𞤲𞤣𞤫𞥅𞤲 𞤲𞤮𞤳𞥆𞤵𞥅𞤪𞤫. 𞤐𞤣𞤫𞤲⹁ 𞤶𞤭𞤪𞤺𞤭𞤱𞤢𞤤 𞤈𞤫𞤲𞤬𞤫 𞤲𞤺𞤢𞤤 𞤣𞤵𞤽𞤭𞤲𞤢𞤲𞤢𞥄 𞤣𞤭𞤤𞥆𞤵𞤺𞤮𞤤 𞤫 𞤬𞤢𞤤𞤶𞤫𞤪𞤫⹁ 𞤪𞤫𞤬𞤼𞤭 𞤲𞤺𞤢𞤤 𞤦𞤵𞤩𞥆𞤮𞤴𞤭𞥅 𞤶𞤭𞤪𞤺𞤭𞤱𞤢𞤤 𞤋𞤪𞤴𞤮 𞤣𞤢𞤪𞤭𞤲𞤮𞥅𞤲𞤺𞤢𞤤 𞤲𞤺𞤢𞤤
𞤔𞤭𞤪𞤺𞤭𞥅𞤶𞤫 𞤯𞤫𞤲 𞤬𞤮𞤨 𞤣𞤢𞤪𞤼𞤭𞤲𞤢𞥄𞤥𞤢
𞤇𞤢𞥄𞤱𞤮 𞤺𞤮𞤲𞤳𞤮𞤲𞥋𞤣𞤭𞤪𞤢𞤤 𞤲𞤺𞤢𞤤⹁ 𞤸𞤮𞥅𞤪𞤫𞥅𞤩𞤫 𞤣𞤢𞥄𞤧𞤮𞤪𞤣𞤫 𞤶𞤭𞤪𞤺𞤭 𞤯𞤫𞤲 𞤣𞤢𞤪𞤲𞤼𞤭𞤲𞤭 𞤶𞤭𞤪𞤺𞤭𞥅𞤶𞤫 𞤴𞤢𞥄𞤱𞤵𞤯𞤫 𞤣𞤮𞤺𞤢𞤴𞤯𞤫 𞤯𞤫𞤲 𞤬𞤮𞤨 𞤸𞤢𞤳𞥆𞤵𞤲𞥋𞤣𞤫 𞤃𞤢𞤣𞤪𞤭𞤣 𞤫 𞤻𞤢𞥄𞤥𞤲𞤢𞥄𞤪𞤭 𞤉𞤧𞤨𞤢𞥄𞤻 𞤲𞤣𞤭𞤲.
𞤂𞤭𞤥𞤮𞥅𞤪𞤫 𞤴𞤭𞤥𞤩𞤫 𞤥𞤢𞥄𞤴𞤵𞤩𞤫 𞤥𞤢𞤤𞥆𞤢 𞤦𞤢𞤪𞤥𞤵𞤩𞤫 𞤩𞤫𞤲 𞤲𞤮 𞤱𞤢𞥄𞤱𞤭 𞤩𞤫𞤴𞤣𞤢𞥄𞤣𞤫 𞤲𞤣𞤫 𞤳𞤵𞤥𞤨𞤭𞤼𞤫 𞤯𞤫𞤲 𞤱𞤫𞥅𞤩𞤭𞤪𞤭 𞤱𞤮𞥅.
𞤃𞤀𞤅𞤋𞥅𞤄𞤉 𞤍𞤋𞤍𞤋 𞤉 𞤐𞤁𞤉𞤈 𞤖𞤋𞤚𞤀𞥄𞤐𞤁𞤉 𞤏𞤌𞥅𞤚𞤉𞤈𞤉
𞤏𞤮𞤲𞤭𞥅 𞤲𞤭𞥅 𞤤𞤢𞥄𞤦𞤭 𞤯𞤭𞤯𞤭⹁ 𞤫 𞤲𞤣𞤫𞤪 𞤸𞤭𞤼𞤢𞥄𞤲𞤣𞤫⹁ 𞤶𞤭𞤪𞤺𞤭𞥅𞤶𞤫 𞤴𞤢𞥄𞤱𞤵𞤯𞤫 𞤲𞤮 𞤺𞤮𞤲𞤳𞤮𞤲’𞤣𞤭𞤪𞤣𞤫 𞤲𞤣𞤫𞤪 𞤉𞤧𞤨𞤢𞥄𞤻. 𞤑𞤢 𞤬𞤵𞤯𞥆𞤮𞥅𞤣𞤫 𞤲𞤣𞤫𞥅 𞤸𞤭𞤼𞤢𞥄𞤲𞤣𞤫 𞤯𞤮𞥅⹁ 𞤻𞤢𞤤𞤲𞤣𞤫 𞥑𞥘 𞤅𞤭𞥅𞤤𞤮⹁ 𞤶𞤭𞤪𞤺𞤭𞥅𞤶𞤫 𞤯𞤭𞤯𞤭 𞤺𞤮𞤲𞤳𞤮𞤲’𞤣𞤭𞤪𞤲𞤮 𞤥𞤮𞤺𞥆𞤮 𞤧𞤢𞤸𞤪𞤫 𞤭𞤲𞥆𞤫𞤼𞤫𞥅𞤲𞤣𞤫 𞤀𞤁𞤀𞤃𞤅. 𞤌𞤲𞤼𞤵𞤥𞤢 𞤳𞤢𞤣𞤭⹁ 𞤳𞤮 𞤩𞤢𞤣𞤲𞤭 𞤴𞤭𞤥𞤩𞤫 𞥕𞥐 𞤥𞤢𞥄𞤴𞤵𞤲𞤮. 𞤍𞤵𞥅𞤯𞤵𞤩𞤫 𞤦𞤢𞤪𞤥𞤭.
𞤐𞤺𞤮𞥅𞤲 𞤥𞤢𞤧𞤭𞥅𞤦𞤮 𞤯𞤮𞤲 𞤳𞤢𞤣𞤭 𞤳𞤮 𞤳𞤢 𞤤𞤢𞥄𞤱𞤮𞤤 𞤸𞤢𞤳𞥆𞤵𞤲’𞤣𞤫 𞤃𞤢𞤣𞤪𞤭𞤣 𞤫 𞤻𞤢𞥄𞤥𞤲𞤢𞥄𞤪𞤭 𞤉𞤧𞤨𞤢𞥄𞤻 𞤲𞤣𞤭𞤲 𞤱𞤢𞤯𞤵𞤲𞤮𞥅. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤳𞤮 𞤶𞤭𞤪𞤺𞤭𞥅𞤶𞤫 𞤯𞤫 𞤯𞤫𞥅 𞤳𞤢𞤬𞤤𞤫 𞤶𞤮𞥅𞤨𞤢𞥄𞤯𞤫 𞤯𞤮𞥅 𞤯𞤭𞤯𞤭 𞤶𞤫𞤴𞤭.
𞤒𞤮 𞤘𞤫𞤲𞤮 𞤣𞤢𞤲𞤣𞤵 𞤫𞤲 𞤱𞤢𞤲𞤮 𞤥𞤵𞤲